COVALIMA–Servisu autoridade Aduaneriu liu husi diresaun Alfandega iha Fronteira Postu Integradu Mota Masin Salele, Periode Janeiru to’o Marsu tinan ne’e asegura sigaru black arrow bal 16, plastik hamutuk saku 20, no motorizada hamutuk-4 ne’ebe hatama mai Timor-Leste liu husi dalan ilegal.
Diretor Serbisu Alfadega Munisipiu Covalima, Nuno Nugueira relata Sigaru black arrow bal hamutuk-16, plastiku hamutuk saku 20 ne’e hatama mai Timor-Leste halo liu husi dalan legal maibe la halo deklarasaun mai alfadega no mos sigaru no platiku refere lei bandu atu hatama mai Timor-Leste.
“Sigaru Black Arrow hamutuk bal-16, plastiku saku-20 ne’e ita prende no asegura ona iha Alfandega Postu Integradu Mota Masin Salele sira hatama mai la halo deklarasaun ba iha Alfandega ne’e ba sigaru ho plastiku” informa Diretór Alfandega Munisípiu Covalima Nunu Nogueira ba jornalista sira iha nia kna’ar fatin Postu Integradu Mota Masin Salele, Postu Administrativu Tilomar, Segunda (04/04).
Diretor Serbisu Alfandega relata kona-ba sasan kontra bandu hanesan sigaru no plastiku mak durante ne’e asegura iha Alfadega Covalima iha Fronterira Salele dadaun ne’e iha hela prosesu nia laran atu halo destruisaun.
Nia dehan kona-ba Motorizada hat ne’ebe Alfandega asegura ne’e ho marka Versa 150 cc 2, Yamaha KLX 1 no Mio Beat 1. Motorizada hat ne’e Alfadega simu husi F-FDTL destakada iha Fronteira Mota masin Salele, Tilomar maka halo kapturasaun wainhira komunidade sira halo negosiu ilegal, maibe motorizada na’in F-FDTL sira la konsege kaputura tanba sira hetan forsa sira halai lakon.
“Ba motorizada hat ne’ebe ohin ita bo’ot sira mos haree rasik ho matan ne’e, bainhira atu halo kaptura ba motorizada na’in sira ne’e la konsege tanba halai lakon hotu, ho nune’e maka ita nia forsa sira intrega motorizada hat ne’e mai iha Alfandega” Diretór Serbisu Alfandega dehan.
Nia haktuir Alfadega sei halo prosesa ba iha Ministeriu Publiku no intrega ba patremonia estadu mak foin haree prosesu kontinuasaun.
“Ho hanoin katak iha trimestral primeiru ne’e ami sei kordena ho MP hodi haree prosesa ba oin” nia informa.
Juridiku Alfandega Munisípiu Covalima Manuel Oliveira ne’ebe responsavel ba area juridisaun Fronteira Salele hatete, tuir deklretu lei 14/2017, merkaduria mak tama Timor-Leste seim dokumentu mak alfandega sei prende hodi submete ba prosesu legal.
Nune’e mos tuir kodigu prosesu penal Timor-Leste artigu 316 hatete ema ne’ebe mak aktividade importasaun no exportasaun mak laliu husi kontrolu alfandega mak sei hetan pena prizaun tinan 2-6 ou kona pena de multa.
“Iha ita nia kodiku penal artigu 316 ko’alia kona-ba ema ne’ebe halo atividade negosiu la liu husi Alfandega ne’e hetan pena prizaun tinan 2-6 ou multa, maibe ne’e tuir ita nia kodiku penal mas ne’e desizaun hotu ikus liu tribunal maka bele deside, ne’e kona-ba motoriza” nia hateten.
Entretantu Sigaru Black Arrow bal-16 no Platiku saku 20 ne’ebe alfadega prende iha ona prosesu nia laran atu halo destruisaun nune’e mos ba motorizada hat ne’ebe alfandega asegura iha ona parte juridisaun hein intrega ba ministeriu publiku hodi halo prosesu kontinuasaun.(Azu)
