Covalima (RCCT)29-07-23-Komunidade Aldeia tolu iha Suku Belulik Leten, Postu Administrativu Fatumea durante ne’e sei halerik ba bee moos tanba komunidade hela iha rai lolon kompara as liu fali bee ne’ebé durante ne’e sira konsumu kalan ho loron.

Administrador Postu Administrativu Fatumea Geraldo Orleans hateten Suku Belulik Leten iha aldeia tolu mak hanesan aldeia Baleo, aldea Klau Halek no Aldeia Mane Ki’ik, durante komunidade sira susar tebes ba bee moos.

“Iha Fatumea, So iha Suku Sentru, Belulik Leten iha Aldeia 3 mak susar tebes atu asesu ba be mos, tanba komunidade sira hele iha rai ida ne’ebe as liu husi be ne’e sira komsumu loro loron, be mosu falu iha kraik, iha foho nia hun, atu hetan be ne’e tenki uja bomba, maibe bomba ne’e uja la dura, makina ne’e avaria tiha atu sosa asesosia sira ne’e tenki hetan iha Australia” esplika Administrador Postu Administrativu Fatumea Geraldo Orleans

Administrador ne’e afirma relasiona ho komunidade aldeia tolu durante ne’e halerik ba bee moos nia parte hato’o ona problema refere ba Bee Timor-Leste atu bele hadi’a fila fali kanu no makina ne’ebé avaria, nune’e mos husi organizasaun noun govermentais hanesan CARE mai survey ona maibe sira nia rezultadu atu implementa ne’e maka seidauk mosu to’o agora.

“Agora dadaun, ami ijiji ona ba Be Timor Leste Atu hadia fali kanu no bomba sira ne’e, ong CARE mos mai Survey ona maibe nia rezulta mak seidauk mosu to’o agora, konsulta ona ho komunidade atu kanaliza hikas kanu sira ne’ebé tohar, ba BTL ami hato’o liu husi enkotru konsellu munisipal. ne’ebé sira mai hare ona dala rua ka tolu maibe implementasaun ne’e mak la mosu” Nia

Entertantu ho makina bomba bee avaria halo komunidade Aldeia tolu obrigado tenke lori sira nia masa la’o ain ho distansia kilo metro ida ka rua tun kuru ba bee iha mota kuak hodi konsumu loro loron.