Covalima (RCCT) 03-02-24-Oras ne’e daudaun komunidade aldeia 29 iha Munisipiu Covalima tempu kalan sei hela iha nakukun laran no uza deit lampu tradisional tanba seidauk asesu ba liña eletrisidade husi Enejia Eletrisidade Timor Leste (EDTL-EP), maibe iha aldeia balu dadaun ne’e iha ona faze konstrusaun no iha Aldeia lima mak remata ona instalaasaun.
Xefe Unidade Enerjia Eletrisidade Munisipiu Covalima, Anorito Mendonca, hatete Aldeia ne’ebé partense Postu Administrativu (PA) Fohorem dadaun ne’e iha hela faze konstrusaun, Aldeia neen iha PA Suai mak dadaun ne’e seidauk Asesu total ba lina Eletrisidade.
“Ita iha Covalima kompostu husi suku 30 ne’e maioria ahi tama hotu ona maibe haree ba aldeia iha aldeia 29 maka ahi sei dauk asesu, depois iha faze levantamentu dadus ka sei dauk asesu ne’e iha aldeia 5 ne’e monta hotu ona maibe ahi seidauk lakan, iha parte Postu Administrativu Fohorem iha aldeia balu sei iha faze konstrusaun mai fali iha postu Administrativu Suai nian iha Suku Beko aldeia 6 maka seidauk asesu eletrisidade hanesan Aldeia Tobur, Teda, Gala, Bibel, Dilo Hilin no aldeia Halik ne’e seidauk asesu total” informa Xefe Unidade Enerjia Eletrisidade Munisipiu Covalima, Anorito Mendonca ba jornalista RCCT iha nia kna’ar fatin Suai Kinta (01/02).
Anorito garantia durante mandatu sei esforsu makas para nune’e lori komunidade sira iha aldeia 29 ne’e bele asesu hotu ba liña eletrisidade.
“Iha ha’u nia mandatu hakarak ka lakohi ida ne’e ha’u tenke esforsu duni ba ita nia klientes ka ba ita nia komunidade sira bele asesu eletrisidade no aldeia sira ne’ebé seidauk asesu ne’e sei liu husi tenderizasaun, maibe ne’e sei hein autorizasaun husi ami nia Prezidente EDTL ho nia estrutura husi nasional ne’eba, munisipiu hein deit husi sira” nia dehan.
Entertantu, Covalima iha Suku 30, Aldeia 148, husi ne’e iha Aldeia 119 mak asesu ona liña eletrisidade nune’e falta aldeia 29 mak dadaun ne’e sei hela iha nakukun wainira kalan tanba seidauk asesu ba lina eletrisidade husi EDTL EP.
Jornalista : Julio Salinas
Edior : Chamot Nahac
