Covalima (RCCT) 05-05-25- Sekretariu Munisipal Administrasaun no Finansas, Alberto Monis de Araujo husu ba Funsionariu sira atu mantein pontulidade, vistuaria no disiplina iha oras servisu.
Aberto Moniz de Araujo dehan lia ne’e wainhira reprezenta Prezidente Autoridade Munisipiu Covalima hodi diriji Serimonia Isar Bandeira, Primeiru semana, ne’ebé realiza iha resintu Administrasaun Munisipiu Covalima, Segunda (05/05).
“Mantein ita nia pozisaun disiplina, pontualidade no vestuariu, tanba saida mak hau dehan hanesan?. Iha Funsionariu barak mak sei viola nafatin, sei la kumpri nafatin, iha sala sira ne’e, ita bo’ot sira hare surat tahan ida taka iha odamatan hakerek “HA’U MOE TAMA TARDE SAI SEDU” ida ne’e atu fanun no sadik ita servisu pontual no mos disiplina” Sekretariu Munisipal Administrasaun no Finansas, Alberto Monis de Araujo, dehan.
Bazeia predisaun husi Diresaun Nasional Meteorologia no Geofisika (DNMG) atu atensaun ba intensidade udan ho intensidade chuviska ba moderadu/naton no lokalmente forte, kuaze iha territoriu nasional principalmente iha kosta sul no rejiaun sentra maka Autoridade ne’e mos husu ba Komunidade Covalima, liu liu ba sira ne’ebé hela besik iha fatin risku sira atu toma atensaun no ses husi fatin risku sira molok dezastre natural akontense.
“ita bot sira akompaña iha Anin, bo’ot, udan bo’ot, tan ne’e iha viazen ruma karik tenki kuidade, Liu liu ba sira ne’ebé hela iha rai lolon sira tenki matan moris neon na’in para ita labele tama iha dezastre ne’ebé ita la espera atu akontese” Tenik nia.
Wainhira akontese udan, anin bo’ot norRai lakan, husu ba populasaun sira atu hadok a’an husi fatin risku sira no buka hela iha fatin ne’ebé seguru. Karik iha kazu emergênsia ruma ou karik presiza halo evakuasaun, mantein kalma nafatin, evita paniku no rona orientasaun husi Autoridade Lokal ou Pessoal Protesaun Sivil ne’ebé besik.
Reportazen : Chamot Nahac
