Covalima (RCCT) 26-05-23- iha loron 26 fulan Maiu tinan 2023, loro kraik maizumenu oras tuku 16 : 43, akontense insendiu ida iha Bairro Kampung Baru, Aldeia Asu Rai, Suku Debos Postu Administrativu Suai, hodi rezulta komunidade nia uma ida ahi han motuk total.
Tuir informasaun ne’ebe Vitima Cicilia da Costa informa ba jornalista sira katak akontesimentu ida ne’e akontese diskonfia mai husi sirkuit eletrisidade, tanba primeiru ne’e haree suar maka sae maka’as husi uma leten no derpente rabenta sai ahi mos komesa lakan maka’as hodi labele salva sasan importante sira iha uma laran liliu hanesan dokumentus, ATM no buat sira seluk tan ahi han hotu.
“Hau hanesan uma na’in momentu akontesimentu ne’e hau iha ne’e, maibe hau mai ahi ne’e sei dauk lakan ida maibe nia suar maka maka’as loos ne’e diskonfia mai husi sirkuit eletrisidade, suar sae hau mai haree ahi komesa rabenta iha uma leten hau mos lahatene saida ida, hau mos labele halo buat ida halai sai mai ho liman tanan deite la lori buat ida tanba ahi komesa lakan maka’as” informa Vitima Cicilia da Costa iha fatin akontesimentu Kampung Baru.
Vitima Cicilia haktuir ho insendiu ne’ebe akontese halo nia parte labele halo buat ida hodi salva sasan importante sira liliu dokumentu sira inklui ATM ho osan ahi han motuk total.
“Ho akontesimentu ne’ebe afeita mai hau labele salva sasan sira tantu atu sasan ki’ik ka boot labele hasai, tanba ida ne’e hau nia uma hela fatin ne’ebe atu saida deit iha hau nia uma laran ne’e ATM no kualker dokumentus saida deit laiha ida maka salva” nia konta.
Xefe Brigada I Bombeiros Lucas de Araujo, informa akontesimentu ne’e akontese iha loro kraik maizuneus oras tuku 16 : 43 no parte bombeiros simu informasaun Komandante Bonbeiru via telefoni iha oras tuku 16 : 45, simu informasaun dehan ahi han uma iha Bairro Kampung Baru, Aldeia Asu Rai, Suku Debos.
“ohin akontesimentu ida ne’e akontese iha oras tuku 16 : 43, ami simu informasaun ami komandante Bombeiros via telefoni liga mai ami iha oras tuku 16 :45, kuandu ami simu informasaun dehan ahi han uma iha Aldeia Asu Rai, bainhira ami simu tiha informasaun ami aranka mai iha fatin akontesimentu hodi komabate insendiu ne’e” nia informa.
Nia haktuir bainhira ekipa Bonbeiros to’o iha fatin akontesimentu haree ahi lakan boot ona, depois ekipa bombeiros balun hamate ahi no balun ajuda hodi hasai kareta ne’ebe para besik hela ho ahi.
Lucas rekonese katak sasan uma laran labele salva so salva deit maka kareta, maibe ba kareta ne’e hetan salva lalais tanba komunidade ho kolega bombeiros balun lalais hodi sai husi uma ne’ebe ahi han ba tau ses dook tiha tanba kareta mos save laiha, maibe sasan sira seluk hanesan osan, ATM, dokumentu inklui sasan mean sira hanesan brinkus, kadeli, korente no sira seluk labele salva tanba ahi han hotu.
Entertantu Segundu Komandante Autoridade Protesaun Civil (APC) Munisipiu Covalima. Julio Alves hatete ho insendiu ida ne’e halo uma na’in labele aproveita nia sasan tanba ahi han hotu no uma na’in mos laiha haree fali ahi maka lakan sae maka’as ona.
“Bainhira ita alin Marcos Gusmão ninia uma ne’e ahi hab buat hotu-hotu la aproveita, nia dokumentu importante balun hasai maibe balu hasai ka lae tanba husi ekipa Bombeiros mai proteje no ahi komesa mate ona mas sasan sira ahi han hotu, tanba iha insendiu ida ne’e Sr Marcos mos laiha, ninia kaben rasik mos laiha maibe ninia alin na’in rua maka iha uma ne’ebe bainhira ami to’o mai mos sasan balu konsege hasai maibe barak liu maka la hasai” nia esplika.
Julio Alves afirma insendiu ida ne’e akontese iha loron sesta tanba ne’e iha Segunda ekipa husi APC foin bele mai foti dadus kona-ba sasan sira ne’ebe ahi han ona, neste momentu APC iha material food no no food item iha.
Tuir segundu komandante APC Munisipiu Covalima dehan, haree ba atu apoiu emerjensia ne’e haree ba kategoria tolu liliu kona-ba uma tuir buat ne’ebe maka hetan na estragus, tanba parte governu atu fo ajuda haree tuir buat ne’ebe hetan estragus total fo material tuir ida ne’e.
Entertantu relasiona ho insendiu ahi han uma ida iha Aldeia Asu Rai, Suku Debos maioria sasan uma laran dokumentus importante balun la konsege salva tanba lakon maka’as no uma nain Marco Gusmão iha hela Dili hela deit nia kaben Cicilia da Costa maibe labele halo buat atu salva sasan uma laran inklui osan ho ATM ahi han motuk total.(JS)
