COVALIMA—Administrador Munisipiu Covalima Francisco de Andrade, rekonese povu iha Postu Fatululik iha duni produtu lokal maibe susar atu hodi asesu ba iha merkadu tanba impede husi kondisaun estrada ladiak.
“loos duni durante povu iha Postu Administrativu Fatululik iha duni produtu lokal liliu hanesan talas, Kamii, bua, malus no produtu sira seluk maibe susar tebes atu lori asesu ba merkadu tanba estrada ladiak halo sira labele fa’an tun ba iha merkadu” informa Administrador Munisípiu Covalima Francisco de Andrade ba komunidade sira iha Aldeia Fatu-Loro, Suku Taroman, Postu Administrativu Fatululik Kinta (17/02).
Administrador haktuir planu oitavu governu konstituisional iha tinan 2023 ne’e sei hadi’a estrada ligasaun hahu husi Altu Lebos, mai iha Lela, tun mai iha Mota Taroman Fatululik liga ba iha Fohorem, Fatumea, Tilomar no husi Tilomar tun ba fali iha Fohorem Dato Rua.
“Loos duni estrada ida ne’e tama ona ba iha planu 2023 nian ne’ebe entre autoridade ho Ministériu Obras Publika tau ona planu, estrada ne’e laos iha Fatululik deit, maibe maibe tuir dezenu ne’ebe sira fo kata estrada hahu husi Altu Lebos mai iha Lela, Postu Administrativu Maucatar nian tun mai iha Ponte Taroman Fatululik tun ba Ai Toun, liga ba Suku Dato Rua, ba Fatumea tun fali ba Tilomar liga fali ba iha Postu Fohorem ba fali Suku Dato Rua ne’e tama estrada id ne’ebe nivel nasional ninian” nia informa.
Reprezentante Komunidade Fatululik, Edmundo Pereirra, dehan durante ne’e komunidade iha Fatululik halerik liu ba iha estrada no susar tebes atu bele lori sira nia produtu lokal asesu ba merkadu iha munisipiu.
“Postu Administrativu Fatululik kompostu husi suku rua, durante ne’e komunidade nia halerik liliu kona-ba estrada, bainhira komunidade atu fa’an sira nia produtu lokal lori ba iha munisípiu ne’eba ladiak tanba kondisaun estrada la premise sira atu bele lori produtu ba to’o iha ne’eba” nia dehan.
Nia afirma alende estrada komunidade iha Fatu-Loro mos sei moris iha nakukun laran maske oras rin eletrisidade harii ona iha Fatu-Loro maibe fiu sei dauk dada nafatin tanba ne’e halo komunidade sira sei kontinua moris iha nakukun laran.(Azu)
