COVALIMA—-Administrador Munisípiu Covalima, Fransisco de Andrade, kestiona kona-ba serbisu funsionariu Programa Nasionál Dezenvolvimentu Suku (PNDS) iha Postu administrativu sira serbisu la Pontualidade tanba ne’e husu ba oin ne’e atu sira nia lista prezensa ne’e ba iha postu, atu nune’e Administrador Postu sira bele halo kontrolu ba sira nia pontualidade serbisu.
“Iha biban ne’e hau atu apela kedas liliu ba funsionariu PNDS sira iha postu sira nia lista prezensa aprezebta ba iha administrador postu atu nune’e kontrola sira pontualidade serbisu, tanba dala ruma ita tun halo monitorizasaun ba UKL iha postu ita husu funsionariu PNDS dala ruma xefe suku responde dehan sira sei dauk mai husi Suai, tanba ne’e mak iha fulan Marsu agora mai ne’e hau tenke tun ba iha Suku hotu atu haree kona-ba buat ida ne’e” informa Administrador Munisípiu Covalima Francisco de Andrade iha nia intervensaun hafoin partisipa , PNDS Sosializa Mata Dalan Dekretu Lei No.8/2013 Iha Munisipiu Covalima Sesta (24/02).
Administrador dehan se karik funsionariu mai ho pontualidade labele mai tuir vontade deit, tanba iha altura imi tama serbisu laos governu maka ba dada imi nia liman mai tama serbisu, maibe ema ida-idak rasik maka buka serbisu, tanba ne’e bainhira tama ona serbisu tenke serbi halo didiak ba povu no rai ida ne’e
Administradór husu ba administradór postu administrativu no xefe suku sira atu halo kontrolu maka’as ba iha funsionariu sira labele fo biban ba sira atu tama serbisu tuir sira nia hakarak deit, tanba sai servidor ne’e atu hadia povu nia moris.
“Labele serbisu tiha mai oras la to’o dauk mos hakarak fila lalais ba uma ida ne’e labele akontese tan, kuandu sai nudar funsionariu ida hala’o serbisu laloos maka ita nia povu sei moris ladiak, tanba sai funsionariu kada fulan simu osan atu halo serbisu ba povu” nia dehan.
Administrador Munisipiu ne’e husu mos ba iha Diretor PNDS munisipiu katak fo mos mata dalan ida ne’e ba xefe suku no administrador postu sira atu bele lee nune’e sira mos bele hatene sira nia kna’ar nidar saida iha PNDS ne’e.
Diretór PNDS Munisípiu Covalima Filipe Cardoso, informa relasiona ho administrador kestiona kona-ba pontualidade funsionariu sira nia serbisu, hanoin informasaun ida partenente tebes prezensa pontualidade serbisu husi funsionariu PNDS iha munisipiu hamutuk ho postu importante atu garantia kalendariu implementasaun PNDS.
“Sim.hanesan ohin intervensaun husi Administrador Munisipiu Covalima iha abertura sosializasaun PNDS ano fiskal 2023 kestiona.mos kona-ba pontualidade serbisu funsionariu PNDS, informasaun ida ne’e pertinente tanba ne’e prezensa pontualidade serbisu husi ekipa PNDS iha munisipiu hamutuk ho postu importante atu garantia kalendariu implementasaun PNDS” nia dehan.
Nia sublina, hanesan responsavel PNDS munisipiu iha 10 Novembru 2021 prepara ona sirkular ida, ne’ebe sirkular ne’e rasik administrador munisipiu maka aprova no asina, iha sirkular ne’e enviable kedas sirkular ne’e ba administradór postu sira hotu tanba iha parte ida ejiji duni administrador postu administrativu 7 ninia intervensaun atu kontrola direita ba funsionariu PNDS ne’ebe destakada ba iha postu.
Iha ne’eba pontus lubuk ida katak administrador postu sira molok aprova lista prezensa kada mes tenke kontrola funsionariu PNDS nia prezensa karik falta tenke tau falta, karik lisensa tenke tau lisensa.(Azu)
