Administrador Covalima “Sai funsionario atu serbi povu, la’os atu tur deit iha uma”

Covalima (RCCT)-23-03-21- Hafoin remata engkontru ho diretores no funsionario sira iha Administrasaun Municipio Covalima, Francisco de Andrade Aktual Administrador Municipio Covalima hatete sei tau prioridade no fo atensaun ba disiplina funcionarios sira nian.

 “Asunto nebe atu aplika iha Fulan Abril oin mai, sei foka liu ba iha lista prezensa úniku ida, ami sei tau iha Gabinete Administrasaun nian, atu nune’e bele kontrola prezensa kada pessoal ninian, dalaruma tuir Lei Funsaun Pública katak tuku 8:00 dader Otl, Funsionários hotu tenke iha ona servisu fatin, maibe realidade ha’u tama Loron rua ona iha ne’e, tuku 8:00 ona mos Funsionários sira seidauk tama servisu ” Dehan Administrador Municipio Covalima Francisco de Andrade.

Enkuanto Administrador Andrade mos informa, tuir regras nebe iha, kada Funsionário tenke asina lista prezensa  dala ha’at (4)  kada loron, tanba ne’e wainhhira iha funsionário nebe maka viola regras hirak ne’e, sei afeta ba nia saláriu mensal.

“Tuir regras nebe iha Loron ida, tenke assina dala ha’at (4), tuku 8:00 tenke assina, tuku 12:00 tenke assina, tuku 02:00 tenke assina no tuku 05:30 atu sai mos tenke assina, katak loron ida la assina dala 4 konsidera falta loron ida, ne’e sei afeta ba nia saláriu, tamba sai Funsionário ne’e hanesan servidor ba Povu, la’os sai Funsionário atu hela iha uma, nebe tenke  kumpri dever nudar ema Funsionário” Tenik Administrador Covalima Francisco de Andrade.

Jornalista                     : Tynho Gusmão

Editor                           : Chamot Nahac