ANM Mobiliza Apoiu Material Konstrusaun ba Prizaun Suai

Covalima (RCCT), 17 Novembru 2026–Autoridade Nasionál Minerál, Institutu Públiku (ANM, I.P.), ho kolaborasaun husi Empreza Montaña Di’ak Unipessoal, Lda., entrega apoiu material konstrusaun ba Prizaun Suai, Munisípiu Covalima, atu suporta konstrusaun fatin hakiak animál.

Apoiu material ne’e kompostu husi simentu, rai-henek no fatuk, ne’ebé sei uza atu konstrui fatin hakiak fahi iha área Prizaun Suai.

Inisiativa ne’e iha objetivu atu kria oportunidade ba prizioneiru sira atu partisipa iha atividade produtiva, aprende abilidade foun no dezenvolve sira-nia kapasidade durante hala’o pena. Ho nune’e, bainhira remata sira-nia pena, prizioneiru sira bele integra fali ho di’ak iha família no komunidade.

Diretór Ezekutivu ANM, I.P., David de Araújo, esplika katak ANM, I.P. nu’udar instituisaun ne’ebé iha tutela Ministériu Petróleu no Rekursu Minerál, estabelese husi IX Governu Konstitusionál atu regula no superviziona atividade empreza sira ne’ebé hala’o esplorasaun no esplotasaun rekursu minerál iha territóriu nasionál.

“ANM, I.P. iha responsabilidade atu jere no regula empreza sira ne’ebé hala’o atividade esplorasaun no esplotasaun rekursu minerál, inklui osan-mean, osan-mutin, manganés no rekursu minerál seluk ne’ebé iha valór ekonómiku ba nasaun,” David de Araújo afirma.

Nia hatutan katak rekursu minerál sira ne’e la’ós de’it kontribui ba aumentu reseita Estadu nian, maibé mós kria oportunidade empregu ba povu Timoroan, fó benefísiu ba empreza lokál no permite dezenvolve programa sosiál atu apoia komunidade.

Iha parte seluk, reprezentante PAM Covalima no Diretór Programa Nasional Dezenvolvimentu Suku (PNDS) Munisípiu Covalima, Pedro Gomez Orgullu, hato’o apresiasaun ba ANM, I.P. tanba nia inisiativa atu mobiliza apoiu husi setór privadu ba Prizaun Suai.

“Ami agradese ba Diretór Ezekutivu ANM nia esforsu ne’ebé buka dalan atu mobiliza apoiu ba Prizaun Suai, no konsege hetan empreza ne’ebé iha vontade di’ak atu kontribui material konstrusaun, hanesan simentu, rai-henek no fatuk,” Pedro Gomez Orgullu dehan.

Iha parte seluk, Diretór Prizaun Suai, Rui Gonsalves, subliña katak reabilitasaun prizioneiru sira presiza kolaborasaun husi parte hotu, la’ós responsabilidade instituisaun prizaun nian mesak.

“Responsabilidade atu ajuda ita-nia maun-alin sira ne’ebé hela iha prizaun la’ós responsabilidade Prizaun Suai nian mesak, maibé presiza ita hotu nia kolaborasaun no servisu hamutuk atu sira bele muda ba di’ak, hamenus violénsia no prepara an atu moris ho dame iha komunidade,” Rui Gonsalves afirma.

Nia mós apela ba parte hotu atu kontinua servisu hamutuk hodi harii komunidade ne’ebé moris iha dame no hakmatek.

“Ita hotu iha mehi atu haree komunidade ida ne’ebé moris iha dame no hakmatek. Tanba ne’e, ita presiza servisu hamutuk no husu Maromak nia tulun atu ita-nia mehi bele sai realidade,” Rui Gonsalves afirma.

Jornalista: J. Correia

Editór: Paul Mandeu

Array