Covalima (RCCT), 16 Novembru 2026 – Produsaun hare kulit iha Munisípiu Covalima iha tinan 2026 aumenta ba toneladas 15.782,35, kompara ho tinan 2025 ne’ebé prodús besik toneladas 13.000.
Produsaun hare ne’e maioria mai husi Postu Administrativu Jumalaín, Tilomar no Suai Vila, enkuantu Postu Administrativu Fatumea hetan produsaun uitoan. Postu Administrativu Fatu Lulik, Maukatar no Fohorem la konsege hetan produsaun hare iha tinan ne’e.
Diretór Agrikultura Munisípiu Covalima, Lino Magno, informa katak produsaun iha tinan 2026 aumenta kompara ho tinan kotuk.
“Se ita kompara produsaun tinan agora ho tinan kotuk 2025, produsaun agora barak liu. Iha tinan 2025 produsaun ho de’it toneladas 13.000, maibé iha tinan ne’e aumenta ba toneladas 15.000 resin,” Lino Magno relata.
Nia esplika katak aumentu produsaun ne’e mos apoiu husi servisu Extensionista Agrikultura sira ne’ebé hala’o atividade iha baze, liuliu liu husi sistema intensifikasaun no orientasaun ba agrikultór sira.
“Husi produsaun ne’ebé hatudu, iha sistema rua, hanesan intensifikasaun ne’ebé ita nia Extensionista sira hala’o servisu iha baze ho agrikultór sira. Ba oin, maioria ita sei uza variedade hare ‘Nakroma’. Iha mos variedade foun tama iha tinan kotuk, maibé produsaun seidauk máximu no nia la konsege tahan kompetisaun ho du’ut ne’ebé moris barak. Tanba ne’e, ba oin ita nafatin uza variedade Nakroma,” nia hatutan.
TRATOR 27 SEI APOIU AGRIKULTÓR
Lino Magno mos hatutan katak atualmente iha trator hamutuk 27 ne’ebé halo operasaun iha Munisípiu Covalima atu apoia atividade agrikultura.
Trator sira ne’e uza mina gratuita, maibé kuandu mina ne’e hotu, agrikultór sira ne’ebé presiza bele sosa mina rasik. Maski nune’e, prioridade sei fó ba agrikultór sira ne’ebé iha kapasidade ekonómika limitadu.
“Kuandu mina hotu ona, ema sira ne’ebé hakarak sosa rasik nia mina, ita nafatin apoiu. Maibé prioridade mak ba ema sira ne’ebé kibit laek. Ita la fó gratuita ba funsionáriu sira,” Lino Magno afirma.
Husi total trator 27, 4 aloka ba Postu Administrativu Jumalaín, 4 ba Tilomar, 5 ba Maukatar no 14 ba Suai Vila.
Nia dehan katak distribuisaun trator sira ne’e seidauk bele konsidera sufisiente ka la sufisiente, tanba dependente ba forsa no rekursu ne’ebé Governu iha atu apoia agrikultór sira.
Jornalista: Jefri
Editor: Paul Mandeu





