Covalima (RCCT), 16 Novembru 2026—Sekretariadu Tékniku Administrasaun Eleitorál (STAE) Munisípiu Covalima halo rekrutamentu ba brigadista na’in 111 atu servisu iha sentru votasaun 111, nu’udar preparasaun ba Eleisaun Prezidensiál ne’ebé sei hala’o iha tinan 2027.
Diretór STAE Munisípiu Covalima, João Tilman, informa katak rekrutamentu ne’e presiza brigadista na’in 111, no kada sentru votasaun hetan brigadista ida.
“Rekrutamentu ami presiza brigadista na’in 111 ne’ebé atu desloka iha kada sentru votasaun 111. Rekrutamentu ne’e halo preparasaun ba Eleisaun Prezidensiál iha 2027,” João Tilman afirma.
Nia esplika katak, antes ne’e STAE identifika sentru votasaun hamutuk 114, maibé sentru votasaun 3 la inklui iha utilizasaun tanba distánsia entre sentru votasaun sira besik malu.
“Uluk ami halo identifika ona mak iha 114, maibé 3 la merese tanba monta sentru votasaun ita la bele monta besik malu. Kada sentru votasaun brigada ida, ne’e sufisiente. Agora dadaun ami iha kandidatu ne’ebé submete dokumentu na’in 467. Depois selesaun dokumentu, iha na’in 397, sira ne’ebé la pasa iha 70. Depois ami sei iha teste entrevista. Agora dadaun iha faze eskrita durante loron rua,” nia hatutan.
Iha parte preparasaun téknika, João Tilman hateten katak, iha fulan Jullu no Agostu, STAE halo ona levantamentu no identifikasaun ba sentru votasaun sira. Husi levantamentu ne’e, identifika dezafiu balu, hanesan kondisaun estrada ne’ebé la di’ak, difikuldade asesu ba transporte no falta kadeira no meza iha sentru votasaun balu.
“Iha fulan Jullu no Agostu ami halo ona levantamentu no identifikasaun ba sentru votasaun. Dala ruma iha sentru votasaun balu mak ita hare estrada la di’ak atu asesu transporte, iha sentru votasaun balu kadeira meza la iha,” nia esplika.
Nia aumenta katak, ba sentru votasaun sira ne’ebé difisil atu asesu, STAE sei buka solusaun, inklui selu ema atu ajuda lori materiál ba sentru votasaun.
“Fatin iha 15 hanesan agora dadaun ita hare iha Postu Fatu-Lulik kuandu tempu udan ne’e presiza pasiénsia. Ita tenke selu ema hanesan iha Postu Fohorem, Suku Dato Tolu, estrada la di’ak ne’e ami presiza selu ema no fatin seluk tan,” João Tilman deklara.
Enkuantu ne’e, kandidatu Ingnasio Marçal Nunes hateten katak nia sente agradese no orgullu tanba hetan oportunidade atu tuir ezame rekrutamentu iha STAE.
“Ha’u sente agradese no orgullu. Matéria ne’e ohin ami ezame iha fatin Sentru STAE, ami ezame ho di’ak. Buat ne’ebé ami la komprende bele aumenta tan ami nia hanoin, depois ami bele komprende liu tan. Karik ba oin atu pasa ka la pasa ne’e depende ba sira STAE mak deside,” Ingnasio Marçal Nunes afirma.
Nia mós promete katak, se hetan oportunidade atu pasa iha ezame ne’e, sei kumpre regra STAE nian no hala’o knaar ho responsabilidade.
“Se karik ita liu iha ezame refere, ita nafatin kompri regras husi STAE, ne’e atu ita hala’o servisu ho di’ak, hatudu ita nia profisionalizmu ho konfiansa ne’ebé fó mai ita atu servisu ho di’ak,” nia afirma.
Jornalista : J Correia
Editor : Paul Mandeu





