Covalima (RCCT), 09 Novembru 2026 — Centru Juventude Covalima realiza enkontru ho Pontu Fokál Ministériu Juventude, Desportu, Arte no Kultura (MJDAC) iha Postu Administrativu hitu (7), hamutuk ho Komisaun Organizadora, atu prepara atividade komemorasaun Loron Masakre Santa Cruz ba dala 35, ne’ebé sei hala’o iha Postu Administrativu hitu iha Munisípiu Covalima.
Diretór Ezekutivu Centru Juventude Covalima, Julio Ferreira, informa katak orsamentu ne’ebé aloka ba atividade komemorasaun tinan ida-ne’e hamutuk US$5.000, ne’ebé sei fahe ba Postu Administrativu hitu, tuir Termu Referénsia (ToR) ne’ebé Ministériu Juventude, Desportu, Arte no Kultura aprova.
Nia esplika katak, antes ne’e, orsamentu ne’ebé disponivel hamutuk US$5.833, maibé depois de ekipa téknika halo avaliasaun, deside atu hamenus orsamentu ba US$5.000 ba Munisipiu Covalima inklui kada Munisípiu.
“Momentu ne’e ita iha US$5.833, maibé depois ekipa téknika halo avaliasaun, orsamentu ne’e sei redus ba US$5.000. Tinan ida-ne’e, Centru Juventude Covalima nafatin hamutuk ho parseiru MJDAC, ho alokasaun orsamentu hamutuk US$5.000 ba loron 12 Novembru. Orsamentu ne’e sei aloka ba Postu Administrativu hitu, no kada postu sei hetan US$650, bazeia ba ToR ne’ebé Ministériu aprova,” Julio Ferreira afirma.
Atividade sira ne’ebé sai prioridade iha komemorasaun ne’e inklui kompetisaun diskursu públiku iha lian Inglés no Portugés, semináriu, atividade sosiál, misa no atividade kari ai-funan, atu marka komemorasaun Loron Masakre Santa Cruz.
Jornalista : J. Correia
Editor : Paul Mandeu
