Covalima (RCCT), 02-10-2026 — Felixberto dos Santos Soares relata kronolojia kona-ba tratamentu ba nia oan iha Hospital Referál Suai (HRS), ne’ebé tuir nia deklarasaun, hakotu is iha oras 22:30, loron 30 Setembru 2026.
Felixberto hato’o alegasaun kona-ba falta ekipamentu iha servisu Laboratóriu HRS, durante prosesu prepara doasaun ran ba nia oan.
Tuir Felixberto dos Santos Soares nia relata, iha oras 19:00, loron 30 Setembru 2026, nia lori nia oan ho kondisaun grave ba HRS.
To’o iha sala Emerjénsia, nia oan hetan atendimentu husi doutór sira ne’ebé servisu iha sala ne’e. Depois hetan atendimentu, tuir nia relata, profisionál saúde sira haruka nia lori nia oan nia ran ba sala Laboratóriu atu halo teste.
Depois teste ran, doutór iha sala Emerjénsia informa ba nia katak nia oan presiza ran.
Tanba ne’e, Felixberto kontaktu família no belun sira ne’ebé iha tipu ran B+ atu ajuda halo doasaun ran ba nia oan. Bainhira sira to’o iha ospitál, nia lori sira ba sala Laboratóriu.
Tuir nia deklarasaun, iha sala Laboratóriu, doutora ida informa ba nia katak plástiku atu rai ran ba doasaun la disponivel husi horibainrua. Nia hatete katak nia buka dalan atu hetan plástiku ne’e, maibé la konsege.
Nia hatutan katak iha oras 22:00, nia simu informasaun katak plástiku ne’e disponivel fali ona no prosesu doasaun ran hahú. Maibé, tuir nia deklarasaun, iha oras 22:30, nia oan hakotu is, antes ran ne’ebé prepara liuhusi doasaun bele lori ba nia oan.
Felixberto dos Santos Soares hatete katak nia la satisfás ho servisu iha parte Laboratóriu, bazeia ba situasaun ne’ebé nia relata. Nia mós afirma katak nia la iha kbiit atu kontra situasaun ne’e.
Nia apela ba profisionál saúde sira atu hala’o knaar ho responsabilidade, hodi evita situasaun hanesan ne’e akontese fali ba labarik sira seluk iha futuru.
Vise-Ministru Saúde Responde
Vise-Ministru ba Fortalesimentu Institusionál Saúde, José dos Reis Magno, hatete katak nia seidauk simu informasaun kona-ba alegasaun falta plástiku atu rai ran ba doasaun iha Hospital Referál Covalima, ne’ebé espalla iha média sosiál.
“Kona-ba informasaun sira ne’ebé mak ita boot sira husu relasiona ho plástiku tau soru iha Hospital Referál Covalima, hau seidauk simu informasaun ba ida ne’e,” José Magno informa.
Nia esplika katak, tuir Lei Orgánika Ministériu Saúde nian, iha instituisaun autónoma sira ne’ebé ida-idak iha kompeténsia rasik.
Maibé, José Magno subliña katak nesesidade povu nian labele adia, liuliu bainhira ema moras no presiza ekipamentu ka servisu saúde.
“Maibé dala barak hau ko’alia katak nesesidade povu nian ita la bele adia. Ita imajina ita sira ne’e mak moras, ita baixa, ita presiza duni sasán sira ne’e,” nia dehan.
Nia hatete katak sei kontaktu Diretór Servisu Saúde Munisípiu Covalima atu haree ba problema ne’e. Nia mós esplika katak, kona-ba ospitál, Diretór Ezekutivu mak responsavel atu haree no responde ba asuntu sira iha ospitál.
José Magno mós agradese ba jornalista sira tanba fó informasaun kona-ba problema ne’e, atu nune’e autoridade kompetente sira bele haree no hadi’a servisu saúde.
Jornalista: J. Correia
Editor: Paul Mandeu
