Covalima (RCCT), 23 Setembru 2026 – Autoridade Protesaun Civíl (APC) observa diretamente área afetada husi dezastre naturál iha Aldeia Ila, Suku Belekasak, Postu Administrativu Maucatar, Munisípiu Covalima, atu avalia kondisaun komunidade no nesesidade ba konstrusaun estrada ba bairru foun.
Prezidente APC, Jesuino dos Reis Matos Carvalho, akompañadu husi Komandante APC Munisípiu Covalima, Celestino Afonso, no korpu bombeiru, hala’o vizita ne’e atu haree diretamente situasaun família vítima sira no ko’alia kona-ba prosesu evakuasaun ba fatin ne’ebé seguru liután.
Jesuino dos Reis Matos Carvalho hateten katak vizita ne’e mós atu konfirma preparasaun materiál konstrusaun ne’ebé sei uza hodi loke estrada ba komunidade afetada, ho apoiu husi IGE.
Nia esplika katak área ne’ebé komunidade hela agora iha risku ba dezastre naturál. Tanba ne’e, APC ko’alia ona ho família sira kona-ba mudansa ba bairru foun, no komunidade sira aseita ona proposta ne’e.
Tuir APC, família na’in-57 sai vítima dezastre naturál, liu-liu tanba erosaun, no sei transfere ba bairru foun. APC sei kontinua halo verifikasaun ba família sira atu konfirma dadus no nesesidade sira antes prosesu transferénsia.
Iha parte seluk, Administradór Postu Administrativu Maucatar, Laurentino de Jesus, hateten katak nia submete ona pedidu ba Prezidente Autoridade Munisípiu Covalima kona-ba loke estrada ba komunidade vítima sira, maibé to’o agora seidauk hetan rezultadu.
Nia afirma katak disponibilidade materiál konstrusaun ne’ebé rai hela iha fatin ne’e sai preokupasaun, tanba komunidade presiza estrada atu asesu ba bairru foun no hahú harii fali uma sira ne’ebé hetan estragu husi dezastre naturál iha fulan Maiu.
APC sei komemora Loron Mundiál Dezastre Naturál iha 13 Outubru 2026, iha Aldeia Ila, Suku Belekasak, ho objetivu atu hasa’e konsiénsia komunidade nian kona-ba prevensaun no preparasaun hasoru dezastre naturál.
Atividade komemorativa ne’e sei inklui animasaun ba vítima dezastre naturál, konkursu ba estudante sira, simulasaun evakuasaun, dada tali ba joven sira no atividade seluk.
Jornalista: Paul Mandeu
