Covalima (RCCT), 21 Setembru 2026—Joven husi Postu Administrativu Fatululik, Cezario da Cruz, kestiona polítika kolokasaun profesór ne’ebé implementa husi Ministériu Edukasaun (ME), ne’ebé tuir nia, seidauk bazeia ho di’ak ba área formasaun no nivel akadémiku profesór sira.
Cezario da Cruz hato’o nia preokupasaun kona-ba kolokasaun manorin sira ne’ebé remata ona estudu superior iha área Informátika (IT), maibé atribui atu hanorin matéria Lian Portugés iha eskola.
“Ha’u kestiona polítika Ministériu Edukasaun kona-ba kolokasaun manorin sira ne’ebé la bazeia ba sira-nia área formasaun akadémika. Ezemplu, manorin sira ne’ebé remata estudu superior iha área Informátika, maibé koloka atu hanorin Lian Portugés,” Cezario da Cruz dehan.
Nia konsidera katak, kolokasaun profesór ne’ebé la tuir área formasaun akadémika bele afeta prosesu aprendizajen estudante sira iha sala de aula.
Tanba ne’e, nia husu Ministériu Edukasaun atu konsidera área formasaun no kompeténsia profisionál ida-idak bainhira halo kolokasaun, hodi bele kontribui ba garantia kualidade ensinu no aprendizajen iha Timor-Leste.
“Hanesan joven ida iha Postu Administrativu Fatululik, ha’u preokupa tanba kolokasaun profesór ne’ebé la tuir área formasaun bele fó impaktu ba estudante sira-nia prosesu aprendizajen. Oinsá mak ita bele garante kualidade edukasaun se kolokasaun la bazeia ba sira-nia formasaun?” nia husu.
Prezidente Autoridade Munisípiu Husu Avaliasaun
Hatan ba preokupasaun ne’e, Prezidente Autoridade Munisípiu Covalima, Miguel Armada Cardoso, orienta Administradór Postu Administrativu Fatululik atu fó atensaun ba asuntu kolokasaun profesór sira.
Miguel Armada Cardoso hateten katak, sei bolu Diretora Edukasaun atu haree no avalia fali kolokasaun profesór sira, liuliu kona-ba manorin ne’ebé nia formasaun akadémika iha área Informátika, maibé atribui atu hanorin Lian Portugés.
Nia esplika katak, situasaun kolokasaun profesór ne’ebé la tuir área formasaun bele akontese iha prátika, maibé presiza haree no avalia profesór ida-idak nia kompeténsia no formasaun, atu determina se profesór ne’e bele kontinua hanorin matéria ne’ebé atribui ba nia ka presiza halo realokasaun ba área ne’ebé apropriadu.
Prezidente Autoridade Munisímiu Covalima mós subliña katak, prosesu kolokasaun tenke konsidera profesór sira-nia kapasidade, kompeténsia no área formasaun, hodi apoia prosesu ensinu no aprendizajen ne’ebé efetivu.
Jornalista: Paul Mandeu
