Covalima (RCCT), 18 Setembru 2026— Sekretáriu Estadu Dezenvolvimentu Lokál (SEDL), Mateus dos Santos W. Tallo, akompaña husi Prezidente Autoridade Munisípiu Covalima, Miguel Armada Cardoso, hamutuk ho estrutura Autoridade Munisípiu, hala’o vizita servisu ba komunidade iha Postu Administrativu Fatululik, Munisípiu Covalima.
Vizita ne’e iha objetivu atu hakbesik Governu ba povu no rona diretamente nesesidade, hanoin no preokupasaun komunidade sira.
“Ha’u mai la’ós atu hanorin, maibé atu rona. Ne’e duni, ha’u husu ba ita hotu atu partisipa ativu. Keta tauk atu ko’alia sai saida mak di’ak no saida mak la di’ak. Governu mai atu servi, la’ós atu manda,” dehan Mateus dos Santos W. Tallo iha nia diskursu.
Mateus mós agradese ba Autoridade Munisípiu Covalima no ekipa ne’ebé organiza vizita servisu ne’e.
“Ha’u agradese barak ba PAM Covalima ho nia ekipa ne’ebé organiza vizita ne’e ho di’ak,” dehan.
Nia hateten katak kontente tanba bele partisipa diretamente ho komunidade Fatululik no lori mensajen IX Governu Konstitusionál kona-ba “Lori Governu Hakbesik ba Povu.”
“Ita-nia Prezidente Autoridade ho estrutura tomak halo atividade rua kada trimestre hodi halo vizita servisu ba postu administrativu hitu no suku 30. Ne’e asaun ka atitude ida ne’ebé loos, tanba dezenvolvimentu lokál labele lao de’it iha Suai. Tenki mai mós iha Fatululik, Tilomar, Fohorem, Zumalai no Maucatar atu rona diretamente povu nia laran-todan,” dehan Mateus.
Iha oportunidade ne’ebá, SEDL rona aprezentasaun husi Autoridade Munisípiu no diretór servisu munisipál sira kona-ba objetivu vizita, progresu servisu, Planu Asaun Anual (PAA) 2027 no Planu Investimentu Infraestrutura.
“Ha’u haree Covalima iha ona vizaun klaru kona-ba infraestrutura bázika,” dehan Mateus.
Nia mós apresia atividade Autoridade Munisípiu Covalima kona-ba diseminasaun informasaun husi Komisaun Nasionál Eleisaun (CNE) kona-ba Lei Eleisaun Munisipál no Podér Lokál.
Nia konsidera informasaun kona-ba eleisaun no podér lokál importante, tanba prosesu ne’e envolve partisipasaun povu iha jestaun no dezenvolvimentu munisípiu.
Prezidente PAM: Vizita Atu Rona Komunidade
Iha sorin seluk, Prezidente Autoridade Munisípiu Covalima, Miguel Armada Cardoso, dehan vizita servisu ne’e importante atu hakbesik Governu ba komunidade.
Atividade ne’e ho tema “Hakbesik Aan ba Komunidade hodi Rona Entidade Hotu Atu Tau iha Planu Dezenvolvimentu Munisipál.”
“Ha’u mai atu rona ita-boot sira nia laran-todan durante tinan naruk. Maske molok ne’e ha’u mai ona hodi kumpri promesa balun, agora ha’u mai atu haree fali servisu sira ne’e lao ka lae,” dehan Miguel.
Nia hateten katak, liuhusi vizita servisu ne’e, autoridade sira la’ós mai ko’alia de’it, maibé fó prioridade ba rona komunidade nia hanoin no nesesidade.
Autoridade Munisípiu Covalima mós apela ba intelektuál, veteranu no komunidade sira atu partisipa ativu iha atividade sira hanesan ne’e, ne’ebé sai parte husi prosesu planeamentu no dezenvolvimentu munisipál.
Jornalista: Paul Mandeu
