Covalima (RCCT), 15 Setembru 2026 — Centro Comunidade Covalima (CCC), liu husi Programa Edukasaun ne’ebé hetan apoiu husi Friendsof, loke oportunidade bolsu estudu ba juventude no estudante feto no mane ne’ebé gradua ona husi ensinu sekundáriu.

Oportunidade bolsu estudu ne’e oferese ba área tolu, ho vaga kada área nain rua, mak área Professor Ensinu Báziku nain rua, Ospitalidade nain rua no Konstrusaun Jerál nain rua.

Bolsu estudu ne’e prioritariamente oferese ba estudante no juventude sira ne’ebé mai husi família vulnerável, inklui ema ho defisiénsia, LGBTQI+ no oan sira husi sobrevivente.

Programa Manejér Programa Edukasaun Centro Comunidade Covalima (CCC), Bernardino de Jesus, informa katak oportunidade bolsu estudu ne’e loke ba tinan akademiku 2027.

“Loke oportunidade bolsu estudu iha área tolu, hanesan área Professor Ensinu Báziku, área Ospitalidade no Konstrusaun Jerál ba tinan 2027. Área Professor Ensinu Báziku sei hala’o estudu iha Colégio Marista Baucau, área Ospitalidade sei hala’o estudu iha Canossa Suai, no área Konstrusaun Jerál sei hala’o estudu iha Dom Bosco Dili,” Bernardino de Jesus informa.

Nia hatutan katak, ba área Professor Ensinu Báziku, aplikante ne’ebé rejista hamutuk ema nain 17. Husi total ne’e, ema nain 10 pasa iha prosesu selesaun, enkuantu ema nain 7 la pasa tanba dokumentu la kompletu.

“Ohin loron ita halo entrevista ba aplikante nain 10. Rezultadu ema nain 2 mak pasa, kompostu husi feto nain 1 no mane nain 1. Iha fulan Outubru tinan ne’e, ita sei lori sira ba rejistu hodi hein prosesu teste tuir mai. Área Ospitalidade no Konstrusaun Jerál mós sei presiza ema nain 2, maibé ema seidauk mai rejistu no ita nafatin hein aplikante sira,” Bernardino de Jesus hatutan.

Dokumentu ba Área Professor Ensinu Báziku

Ba aplikante sira iha Área Professor Ensinu Báziku, dokumentu ne’ebé presiza aprezenta inklui:

– Fotokópia diploma ensinu sekundáriu legalizadu no orijinál, tahan 3;

– Sertidaun batismu, tahan 3;

– Sertidaun RDTL, tahan 3;

– Bilhete Identidade (BI), tahan 3;

– Kartaun Eleitorál, tahan 3;

– Karta rekomendasaun orijinál husi xefe suku ka amo pároko, tahan 1, dirijida ba Diretor Instituto Católica para a Formação de Professores;

– Atestadu médiku, tahan 1;

– Fotokópia kaderneta ensinu sekundáriu husi klase 1 to’o 3;

– Mapa kor mean.

Dokumentu ba Área Ospitalidade no Konstrusaun Jerál.

Ba Área Treinamentu Ospitalidade no Konstrusaun Jerál, aplikante sira presiza aprezenta:

– Foto koloridu 3×4, tahan 2;

– Fotokópia diploma ensinu sekundáriu;

– Kópia sertidaun batismu, tahan 1;

– Sertidaun RDTL, tahan 1;

– Kartaun Eleitorál, tahan 1;

– Bilhete Identidade (BI), tahan 1;

– Atestadu médiku, tahan 1;

– Kartaun evidénsia husi SEFOPE.

Ba Área Ospitalidade, map tenke uza kor kinur, enkuantu map ba Área Konstrusaun Jerál tenke uza kor azúl.

Rejistu bolsu estudu ba Área Professor Ensinu Báziku termina ona. Enkuantu rejistu ba Área Treinamentu Ospitalidade no Konstrusaun Jerál sei termina iha 30 Setembru 2026.

Jornalista: Julião Correia

Editor: Paul Mandeu