Covalima (RCCT), 11 Setembru 2026 — SERVE, IP Sucursal Munisípiu Covalima rekolla reseita hamutuk US$ 17.688 durante períodu Janeiru to’o Agostu 2026, husi servisu rejistu, renovasaun, retiminu dokumentus no alterasaun ba atividade operadór ekonómiku sira.
Kordenadór SERVE, IP Sucursal Munisípiu Covalima, Domingos Amaral, informa ba jornalista sira katak, durante períodu Janeiru to’o Agostu 2026, rejistu foun hamutuk 45, enkuantu operadór ekonómiku sira ne’ebé mai halo renovasaun no retiminu dokumentus, tanba balu lakon ka balu la iha, ho total 381.
Aleinde ne’e, operadór ekonómiku sira ne’ebé mai halo alterasaun ba atividade, inklui aumenta atividade, troka diretór no muda fatin, hamutuk 101.
“Hahu husi Janeiru to’o Agostu rejistu foun ita iha 45. Sira ne’ebé mai halo renovasaun no mós retiminu dokumentus sira ne’ebé balu lakon, balu la iha, ho total 381. No mós sira ne’ebé mai halo alterasaun liga liu ba aumenta atividade, troka diretór, muda fatin, ne’e hamutuk 101. Ne’ebé total hamutuk husi rejistu hirak ne’e, husi renovasaun no alterasaun, hamutuk iha 567 ne’ebé mak ita halo verifikasaun no rejistu iha SERVE, IP Sucursal Munisípiu Covalima,” Domingos Amaral informa.
Domingos Amaral mós informa katak, durante períodu Janeiru to’o Agostu 2026, SERVE, IP Sucursal Munisípiu Covalima konsege rekolla reseita hamutuk US$ 17.688.
“Husi Janeiru to’o Agostu ita total hamutuk iha US$ 17.688, ne’e reseita ne’ebé mak ita rekolla husi operadór ekonómiku sira ne’ebé mak mai rejista sira-nia atividade iha SERVE, IP Sucursal Munisípiu Covalima,” Domingos Amaral akresenta.
Nia subliña katak entidade ne’ebé hala’o atividade lukrativu obrigatoriamente tenke halo rejistu hodi hetan legalidade, bazeia ba Dekretu-Lei N.° 34/2017 (Lisensiamentu Ekonómiku), ne’ebé hasai iha loron 27 fulan-Setembru tinan 2017.
Lei ne’e regula kona-ba lisensiamentu ba atividade ekonómika, ka Autorização para Exercício de Atividade Económica, ne’ebé SERVE, IP emite.
Jornalista: Julião Correia
Editor: Paul Mandeu
