Covalima (RCCT), 10-09-2026 – Xefe Sentru Saúde Fatululik, Alberto Noronha, hateten katak Sentru Saúde Fatululik presiza konstrusaun no infra-estrutura ne’ebé naton atu bele hadi’a kualidade atendimentu saúde ba komunidade.
Alberto Noronha hateten katak kondisaun sentru saúde ne’ebé ho medida ki’ik no limitasaun espasu halo profisionál saúde sira hasoru difikuldade bainhira presta servisu ba komunidade, liuliu iha implementasaun programa saúde.
“Ami nia sentru saúde ho medida ki’ik, no ami nia kolega sira kontinua presta servisu iha kada programa. Tanba ne’e, ami presiza konstrusaun sentru saúde ne’ebé luan no naton, atu bele fó atendimentu di’ak ba komunidade,” Alberto Noronha informa.
Nia hateten katak konstrusaun no melhoria infra-estrutura importante tebes atu aumenta kapasidade sentru saúde no asegura espasu ne’ebé apropriadu ba profisionál saúde sira no pasiente.
Iha parte seluk, Diretór Servisu Saúde Munisípiu Covalima, Domingos Sequiera, hateten katak Sentru Saúde Fatululik atualmente iha konstrusaun rua, inklui konstrusaun ba servisu maternidade no espasu servisu saúde seluk.
“Agora daudaun iha konstrusaun ba maternidade no sentru saúde. Ami sei haree no analiza nafatin kondisaun no nesesidade sira, atu iha futuru bele hadi’a tan infra-estrutura,” Domingos Sequiera dehan.
Nia esplika katak infra-estrutura ne’ebé daudaun ne’e iha bele uza ona hodi apoia servisu saúde ba komunidade, maibé presiza reabilitasaun no planeamentu ba konstrusaun foun iha futuru.
“Ba oin, ami sei kontinua halo reabilitasaun no planeia konstrusaun foun. Konstrusaun foun dala ruma difísil, maibé ami sei haree no analiza nesesidade atu bele hadi’a infra-estrutura saúde iha Sentru Saúde Fatululik,” nia hatutan.
Nia subliña katak melhoria infra-estrutura saúde sei ajuda profisionál saúde sira atu presta servisu ho di’ak no komunidade bele hetan atendimentu saúde ne’ebé seguru, di’ak no apropriadu.
Jornalista: Julião Correia
Editor: Paul Mandeu
