Covalima (RCCT), 10 Setembru 2026 — Ex-funsionáriu UNAMET Munisípiu Covalima realiza enkontru durante loron rua, hodi prepara partisipasaun iha Kogresu Nasionál ne’ebé sei realiza iha Centru Konvensaun Díli (CCD), husi loron 25 to’o 26 Setembru 2026.
UNAMET (United Nations Mission in East Timor) harii iha tinan 1999 hodi organiza no hala’o Konsulta Popular iha 30 Agostu 1999. UNAMET kompostu husi funsionáriu internasionál no mós Timor-oan sira ne’ebé servisu hanesan local staff.
Eis-Kordenadór UNAMET Munisípiu Covalima, Albertu Moniz de Araújo, informa katak Ex-Funsionáriu UNAMET no Ex-Poling Staff UNAMET Munisípiu Covalima hamutuk 341 ema sei partisipa iha Kogresu Nasionál.
“Ami konvida Ex-Funsionáriu UNAMET no Ex-Poling Staff UNAMET Munisípiu Covalima hamutuk 341, kompostu husi postu 7 iha sentru votasaun 16. Postu Suai Vila iha ema na’in 80, Zumalai iha 19 delegadu, Tilomar ema na’in 10, postu 4 seluk ne’e ema na’in 7, inklui kordenadór postu sira hamutuk ho estrutura UNAMET Munisípiu Covalima. Ami sei partisipa hotu, no loron 24 ne’e ami aranka ona ba Dili atu nune’e bele partisipa iha Kogresu Nasionál durante loron rua, hahu husi loron 25 to’o loron 26 fulan Setembru, ne’ebé sei realiza iha Centru Konvensaun Díli (CCD),” Albertu Moniz de Araújo informa.
Nia hatutan katak partisipasaun iha kongresu ne’e importante, liuliu atu tau atensaun ba Ex-Funsionáriu UNAMET no Ex-Poling Staff sira ne’ebé halo kontribuisaun iha luta ba ukun-rasik-an.
“Parte hotu-hotu komesa tau atensaun maka’as ba Eix-Funsionáriu UNAMET no Poling Staff sira ne’ebé, iha momentu situasaun difísil, sira halo ona kontribuisaun ba luta ukun-rasik-an ida ne’e. Maske iha tempu ne’ebé la naruk se ita kompara ho 1975, maibé iha situasaun 30 Agostu 1999, iha Konsulta Popular, funsionáriu UNAMET no Poling Staff sira ne’e mak hamriik prontu atu mate iha ita-nia maluk liman-kroat nia leet.
“Tanba ne’e, UNAMET hotu-hotu hamutuk atu sei realiza kongresu ida ne’e, atu bele lori rezultadu husi Kogresu Nasionál hato’o ba membru Governu no Estadu, atu tau matan nafatin ba ami Ex-Funsionáriu UNAMET no Ex-Poling Staff sira ne’ebé hola parte ona iha kontribuisaun ukun-rasik-an, ne’ebé halo ona tinan 27, ne’ebé foin lalais ita selebra 30 Agostu Konsulta Popular,” nia esplika.
Atividade enkontru ne’e hala’o iha Salaun Administrasaun Munisipiu Covalima.
Jornalista: Julião Correia
Editor: Paul Mandeu
