Covalima (RCCT), 09 Setembru 2026 — Polísia Nasionál Timor-Leste (PNTL) Munisípiu Covalima deporta sidadaun Indonézia na’in-12 ba Indonézia, tanba uza pasaporte turista ne’ebé fotokópia no prazu validade remata ona ultra pasa liuhusi fronteira mota masin hodi hala’o sira-nia atividade negósiu iha Munisípiu Kovalima.
Segundu Komandante PNTL Munisípiu Covalima, Superintendente Asistente Patrício de Jesus, hateten katak sidadaun Indonézia na’in-12 ne’e PNTL deteta no kaptura iha loron 4 Agostu 2026, hodi halo prosesu identifikasaun no investigasaun.
“Sidadaun ne’ebé mak deporta fila maioria mai husi Indonézia, tanba sira uza viza turista, maibé bainhira ita-nia servisu intelijénsia deteta katak sira halo atividade negósiu, PNTL halo kaptura no lori ba Komandu atu halo prosesu tuir lei,” dehan Patrício de Jesus ba jornalista sira iha Komandu PNTL Covalima, Santa Rosa, ohin.
Nia esplika katak, bazeia ba rezultadu investigasaun, sidadaun na’in-12 ne’e uza pasaporte fotokópia, la uza pasaporte orijinál, no dokumentu balu mós prazu validade remata ona.
“Bainhira sidadaun halo viajen, tenke uza pasaporte orijinál no válidu, la’ós uza fotokópia pasaporte ne’ebé validade remata ona,” nia hateten.
PNTL Covalima, hafoin halo prosesu identifikasaun, halo koordenasaun ho autoridade imigrasaun atu asegura prosesu deportasaun ba Indonézia.
Patrício de Jesus mós hateten katak sidadaun na’in-12 ne’e deteta iha área oioin iha territóriu Munisípiu Covalima, to’o iha nivel suku no aldeia.
Nia apela ba sidadaun estranjeiru sira atu kumpre regra no prosedimentu imigrasaun, inklui uza dokumentu viajen orijinál no válidu bainhira tama no hala’o atividade iha Timor-Leste.
Jornalista: Paul Mandeu
