Covalima (RCCT), 08 Setembru 2026 — Conservasaun Internasional (CI) halo atividade kultural iha Munisípiu Covalima, liu husi ritual tradisionál ne’ebé lidera husi Katuas Lia-Na’in sira, hodi husu lisensa no loke dalan ba esforsu proteksaun no konservasaun biodiversidade iha área tarjetu sira.
CI nia observasaun hatudu katak Munisípiu Covalima iha potensial biodiversidade ne’ebé boot tebes, liuliu iha área Lagoa Hasan Foun, Suku Lalawa; Lagoa Onu Boot, Suku Beiseuk, Postu Administrativu Tilomar; no Lagoa Fuli Rai Mea, Postu Administrativu Zumalai. Área sira ne’e iha rekursus naturál ne’ebé importante ba biodiversidade no presiza proteje no konserva.
Tuir observasaun jornalista sira iha terenu, área tarjetu sira iha potensial boot ba biodiversidade no rekursus naturál, inklui rekursus renovável no non-renovável. Tanba ne’e, presiza iha esforsu konservasaun ne’ebé sustentável hodi asegura katak rikusoin naturál sira bele sai patrimóniu ida ba futuru.
Atividade husu lisensa kultural hahu iha loron 07 Setembru 2026, iha Lagoa Onu Boot, Suku Beiseuk. Ohin, 08 Setembru 2026, atividade kontinua iha Lagoa Hasan Foun, Suku Lalawa, Postu Administrativu Tilomar. Aban, 09 Setembru 2026, sei kontinua iha Lagoa Fuli Rai Mea, Postu Administrativu Zumalai, Munisípiu Covalima.
Programa CI nian sei implementa tuir informasaun ne’ebé antes ona sosializa iha fulan Maiu no Juñu 2026. Agora, CI halo atividade kultural hodi husu lisensa no respeita natureza, kultura no tradisaun lokal, molok implementa programa proteksaun no konservasaun ba biodiversidade iha área sira ne’ebé sai alvu tarjetu.
Iha atividade ne’e, partisipa mos autoridade lokal, Lia-Na’in no Korpu Guarda Floresta sira, hodi hamutuk fó atensaun ba proteksaun no konservasaun rekursus naturál iha Munisípiu Covalima.
Jornalista: Paul Mandeu
