COVALIMA (RCCT), 03-09-2026 — Autoridade Munisipiu Covalima (AMC), liu husi Servisu Munisipal Protesaun Sivil no Jestaun Risku Dezastre Naturais, fó apoiu ba nesesidade baziku ba atividade komemorasaun trágedia violasaun direitus umanus 7 Setembru 1999, ne’ebé sei realiza iha Suku Lour, Postu Administrativu Zumalai, Munisípiu Covalima.
Diretor Servisu Munisipal Protesaun Sivil no Jestaun Risku Dezastre Naturais, João Martins, esplika katak apoiu ne’e fó ba Komisaun Organizadora hafoin hetan despaisu husi Presidente Autoridade Munisipiu Covalima.
“Ami husi Autoridade Munisipiu Covalima, liu husi Servisu Munisipal Protesaun Sivil no Jestaun Risku Dezastre Naturais, depois de hetan despaisu husi ita nia Presidente Autoridade Munisipiu atu fó apoiu ba ita nia Komisaun Organizadora ba komemorasaun loron 7 Setembru ne’ebé akontese iha Suku Lour, ohin loron ami mai fó apoiu ai-han no nesesidade baziku, hanesan foos, supermi, lona ho mina goreng, hodi haforsa Komisaun Organizadora atu bele hala’o eventu komemorasaun,” nia informa.
Iha sorin seluk, Xefi Komisaun Organizadora, Denis Barreto do Santos, hato’o sentimentu orgullu tanba hetan resposta ba pedidu ne’ebé komisaun dirije ba Autoridade Munisipiu Covalima.
Nia dehan apoiu ne’e importante atu responde ba nesesidade konsumusaun komunidade durante atividade komemorasaun ne’ebé sei hala’o durante loron rua iha Suku Lour.
“Nudar Xefi Komisaun, ami sente orgullu tanba ami nia pedidu ne’ebé dirije ba Presidente Autoridade Munisipiu, depois Presidente halo despaisu ba Diretor Protesaun Sivil, no konsege fó duni resposta ba nesesidade baziku ne’ebé ami husu, atu bele responde ba atividade loron rua nian, liu-liu nesesidade baziku ba konsumusaun komunidade sira ne’ebé mai partisipa iha komemorasaun loron istóriku ida ne’e,” nia hatete.
Tuir nia, to’o oras ne’e komisaun foin hetan apoiu husi Servisu Munisipal Protesaun Sivil no sei hein nafatin apoiu husi parte seluk.
“Foin mak hetan apoiu husi Servisu Munisipal Protesaun Sivil no Jestaun Risku Dezastre Naturais. Husi parte seluk, ami seidauk hetan apoiu, maibé Komisaun nafatin hein ba ema barak sira ne’ebé prontu atu fó sira nia tulun ba komemorasaun ida ne’e,” nia hatutan.
Materiál baziku ne’ebé Autoridade Munisipiu Covalima, liu husi Servisu Munisipal Protesaun Sivil no Jestaun Risku Dezastre Naturais, fó apoiu ba atividade komemorasaun trágedia violasaun direitus umanus 7 Setembru 1999 iha Suku Lour inklui foos HADOMI 25 kg, saku 10; masi Midar, doz 10; mie Sedaap, doz 10; mina goreng Viva Joy 6×2 litru, doz 1; no kapa 5.
Jornalista: Julião Correia
Editor: Paul Mandeu
