COVALIMA (RCCT), 03-09-2026 — Komisaun Anti-Korrupsaun (KAK) sosializa medida prevensaun no kombate korrupsaun ba entidade públiku no privadu sira iha Munisípiu Kovalima.
Objetivu husi sensibilizasaun ne’e mak atu hasa’e koñesimentu entidade públiku no privadu sira, hodi bele prevene no evita irregularidade sira, inklui asuntu korrupsaun iha instituisaun estadu.
Adjuntu Prevensaun no Sensibilizasaun KAK, Rosário Salsinha Araújo, informa ba jornalista sira iha Salaun AMC katak semináriu ne’e realiza durante loron ida no foka ba setor públiku, liuliu funsionáriu públiku no dirijente sira.
“Ita realiza semináriu durante loron ida ba setor públiku. Ita hatene setor públiku ba funsionáriu públiku no dirijente tomak, kona-ba Lei KAK, liuliu Lei MPCC Núm. 7/2020, kona-ba medida prevensaun no kombate korrupsaun, asuntu deklarasaun riku-soin, papel KAK, tipu korrupsaun, no oinsá mak bele eduka no sensibiliza nafatin funsionáriu públiku no setor privadu sira atu konsiente no respeita lei, hodi labele hamosu korrupsaun,” hatete Rosário Salsinha Araújo.
Atividade sosializasaun ne’e mós sai parte ida husi preparasaun ba entidade sira, nune’e bainhira iha futuru sira sai lider, bele kompriende di’ak liután kona-ba oinsá atu halo planu no ezekuta orsamentu ho transparénsia no responsabilidade.
Diskusaun durante atividade ne’e lao ho forma interativu, tanba hetan partisipasaun másimu husi entidade sira, inklui setor públiku no privadu.
Iha oportunidade ne’e, partisipante sira mós fó apoiu ba servisu KAK, liuliu iha esforsu atu intensifika kontrolu ba projetu sira no servisu funsionáriu públiku iha edifísiu Governu, hodi prevene irregularidade no korrupsaun.
Jornalista: Paul Mandeu
