Covalima (RCCT), 02-09-2026 — Diresaun Servisu Investigasaun Kriminál (DSIC) no Diresaun Servisu Informasaun Polísia (DSIP), ho apoiu husi Komandu Polísia Munisípiu Covalima, hala’o mandadu buska ba arguidu na’in haat (4), ho inisiál NF, DC, JC no AMA, iha Segunda-feira, 31-08-2026, ho NUC 0016/26CVSUI.
Aksaun ne’e nu’udar parte husi prosesu investigasaun ba kazu Terezina Cardoso, ne’ebé lakon iha área Lagoa Wetaba, Suku Beiseuk, Postu Administrativu Tilomar, Munisípiu Covalima. Kazu ne’e atualmente sei iha prosesu investigasaun husi autoridade kompetente sira.
Mandadu buska hala’o ho objetivu atu buka no rekolla informasaun, objetu ka evidénsia sira ne’ebé bele iha relasaun ho kazu refere, hodi apoia prosesu investigasaun ne’ebé hala’o husi DSIC no DSIP.
Iha implementasaun mandadu buska, ekipa DSIC no DSIP hala’o prosedimentu tuir regra no dispozisaun legál ne’ebé vigora, hodi garante prosesu investigasaun la’o ho transparénsia no respeitu ba direitu legál husi parte hotu.
Depois husi mandadu buska, arguidu na’in haat (4) lori ba sela detensaun Komandu Polísia Munisípiu Covalima hodi kumpri períodu detensaun 72 oras, nu’udar parte husi prosesu investigasaun.
Iha dadeer loron 02-09-2026, arguidu na’in haat (4) transfere ba Tribunal Judisial Primeira Instánsia (TJPI) Suai hodi tuir primeiru interogatóriu judisiál relasiona ho kazu refere.
Iha TJPI Suai, prosesu primeiru interogatóriu hala’o tuir prosedimentu judisiál ne’ebé vigora.
Depois remata prosesu primeiru interogatóriu, Defensor Públiku ne’ebé reprezenta arguidu na’in haat, Domingos dos Santos, hateten katak Ministériu Públiku husu ba tribunal atu aplika medida koasaun prizaun preventiva ba arguidu sira.
Tuir Domingos dos Santos, Defesa la konkorda ho pedidu Ministériu Públiku no alega katak arguidu na’in haat tenke nafatin ho medida Termo de Identidade e Residência (TIR), hodi hein investigasaun kle’an husi autoridade kompetente.
“Ministériu Públiku husu medida koasaun prizaun preventiva. Ha’u, nu’udar Defesa, alega katak arguidu sira nafatin ho medida TIR hodi hein investigasaun kle’an husi parte kompetente, hodi bele aprezenta provas sira iha julgamentu tuir mai iha prosesu komún normal,” Domingos dos Santos hateten.
Defensor Públiku mós hateten katak pozisaun Ministériu Públiku no pozisaun Defesa iha prosesu ne’e diferente, tanba parte ida-idak aprezenta alegasaun tuir nia pozisaun iha prosesu judisiál.
Kazu ne’e, tuir informasaun husi Defesa, Ministériu Públiku relasiona ho alegasaun kona-ba Omisídiu Simples, ne’ebé refere ba Artigu 138 Kódigu Penal.
Iha primeiru interogatóriu ne’e, Ministériu Públiku husu ba tribunal atu aplika medida koasaun prizaun preventiva ba arguidu na’in haat, hodi hein kontinuidade investigasaun no prosesu judisiál tuir dalan legál.
Nota: Arguidu sira konsidera nafatin hanesan ema ne’ebé hetan akuzasaun no suspeita iha prosesu, no responsabilidade kriminál final depende ba desizaun tribunal tuir provas no prosesu judisiál ne’ebé vigora.
Jornalista: Paul Mandeu
