Covalima (RCCT) 28-11-25-Komemora tinan osan mean, loron Proklamasaun Republika Demokratika Timor Leste iha Munisipiu Covalima, Autoridade Munisipal, liu husi Servisu Munisipal Jestaun Merkadu no Turizmu, realiza kompetisaun kulinaria Tradisional no Arte Jenatu ba grupu feto potensial sira.
Xefe Departamentu ba Turizmu iha Servisu Munisipal Jestaun Merkadu no Turizmu Covalima, Mariano Lopes, Informa ba Radio Comunidade Cova Taroman iha kampu ladi, dehan, grupu hamotuk hitu (7) ne’ebé konsidera inovativu mak partisipa iha kompetisaun, iha ne’ebé, grupu Arte Jenatu hamotuk tolu no mos Grupu kulinaria hamotuk hat.
“Grupu sira ne’ebé inovativu, Iha ne’e hakarak fo sai katak, iha grupu hitu mak partisipa, grupu kulinaria hat no grupu arte jenatu tolu mak partisipa. Ita iha ekipa juri hamotuk na’in hat mai husi IEADE, Siguransa Alimentar, Saude, no Servisu Agrikultura, mak halo avaliasaun,” Mariano Lopes, Informa.
Iha fatin hanesan Prezidete Juri ba kompetisaun ne’e, Marcelino Barreto, relata katak, bazeia ba avaliasaun ne’ebé juri halo, grupu kuliner husi Fatuk laran mak hetan primeiru lugar ba kompetisaun kuliner, ho total valor 3925, no mos grupu Dignifika kultura mak hetan primeiru lugar iha kopetisaun arte jenatu.
“Ba Kompetisaun Kulinaria, Grupu ne’ebé hetan Primeiru lugar mak, grupu fatuk laran, ho valor 3925, Segundu lugar, Grupu Lalatak Tasi Laran ho valor 3525, Grupu Hailok hetan Terseiru Lugar ho Valor 2850, no manan na’in ikus liu mak grupu Satap ho total Valor 2250. Manan na’in iha kompetisaiun arte jenatu niak mak , primeiru lugar husi Grupu Dignifika Kultura, Segundu Lugar Grupu Madur, no terseiru maka grupu Celulefil.” Marcelino Barreto, relata.
Grupu arte jenatu ne’ebé mak partisipa iha kopetisaun ne’e komostu husi, Grupu Dignifika Kultura, Grupu Madur, no grupu Celulefil. Engkuantu, ba kopetisisaun Kuliner mai husi grupu Fatuk Laran, Lalatak Tasi Laran, Hailok no mos Grupu Satap.
Entretantu Atividade kompetisaiun ba Arte Jenatu no Kuliner ne’e hala’o iha kampu ladi suai, iha ambitu komemorasaun loron Proklamasaun Timor Leste ba dala 50.
Reportazen Chamot Nahac
