Maubessi (RCCT) 12-08-25- Sekretáriu Estadu Kooperativa (Sekoop), Arsenio Pereira da Silva, hala’o vizita ba iha aldeia Hato-Luli, Suku Maubisse, Postu Administrativu Maubessi, Munisípiu Ainaro hodi haree direita grupu agrikultor sira nia atividade hanesan haki’ak ai funan no haki’ak ai fuan Strawberry.
Sekretáriu Estadu Kooperativa (Sekoop), Arsenio Pereira da Silva ko’alia ba jornalista sira dehan ho vizita ne’e atu haree direta kondisaun no kreatividade grupu produtor sira nian ne’ebé fo rendimentu ba sira hodi sustenta moris.
“Ohin primeira vizita ba iha produsaun ai-funan fresku iha Maubisse, entaun ho ida ne’e segunda vizita mai haree produsaun Strawberry, ita hakarak grupu sira ne’e ho nia kreatividade sira hanesan ne’e ita mai haree para depois hanesan governante saida maka ita fasilita para ita nia produtor sira ne’e bele produs, tanba sira nia rendimentu tenke mai husi produsaun” dehan Sekretáriu Estadu Kooperativa (Sekoop), Arsenio Pereira, ba jornalista sira, hafoin vizita Grupu kuda Strowberry iha to’os Hato-luli, Maubisse.
Arsenio afirma SEKoop iha estratéjia atu fasilita grupu sira ne’ebé eziste ho apoiu husi ajensia Internasionál, wainhira termina SEKoop sei fasilita hodi transforma ba kooperativa.
“Iha SEKoop ita muda ita nia estratéjia ba grupu sira ne’ebé maka eziste iha ne’e, kuandu programa husi Ajénsia fasilita termina ita bele fasilita sira bele sai kooperativa ida. Tanba iha propriu estatutu ba iha kooperativa sustentavel, tanba sira iha mós estatutu rasik ne’e sira bele ba rejistu legalidade iha notariadu, kuandu ida ne’e iha ona defisil sira atu fahe malu, tanba esperensia ne’ebé iha kuandu ajensia sira sei iha buat ne’e la kapa maibe ajensia laiha ona tinan ida ka rua ita mai fali grupu ne’e laiha ona” nia dehan.
Iha SEKoop muda estratejia no halo ona kooperasaun lubuk ida ajensia internasional hanesan World Vision, Plan Internasional no ajensia sira seluk, governu hola papel hanesan fasilitador ba grupu tarjeitu sira ne’e ninia ejistensia bele sustentabel.
Jornalista : Julio Salinas
Editor : Chamot Nahac
