Covalima (RCCT) 22-08-25-Durante semana tolu nia laran servisu Sekretaria Tekniku Administrasaun Eleitoral (STAE) iha Munisipiu Covalima hala’o resensiamentu bimetriku mobel konsege rekolla dadus hamutuk eleitor tuan no foun hamutuk ema na’in Rihun rua sanulu resin sia (2019).
Elitor 2019 ne’e STAE Munisipiu Covalima, atualiza no halo resensiamentu eleitoral biometriku iha Postu Administrativu Fatululik, Fatumea no Fohorem.
“Tuir atendimentu resensiamentu biometriku ne’ebé STAE Munisipiu Covalima hala’o, planu loke postu resensiamentu iha postu ida-idak, ne’e maka iha semana tolu liu ba kompostu husi Postu Fatululik, Fatumea no Fohorem total eleitor sira ne’ebé mai atualiza foun sira hamutuk eleitor 2019 no postu resensiamentu ne’e sei dauk kobre ba iha Tilomar ho Zumalai, maibe Postu Tilomar segunda oin ita komesa hala’o ona resensiamentu biometriku, no iha semana ida ne’e nia hahu husi segunda to’o Sesta ohin Postu Maukatar nian finaliza ona ninia loron atendimentu resensiamentu biometriku” dehan Diretór STAE Munisipiu Covalima, Francisco Gusmão.
Diretór STAE Munisipiu Covalima, Francisco Gusmão subliña katak hala’o resensiamentu mobel hodi atualiza eleitor biometriku ne’e atu ajuda no hakbesik atendementu ba komunidade.
“Meus ne’e uza atu hakbesik ita nia atendimentu ba iha komunidade sira maka loke postu resensiamentu ne’ebé maka ita kada postu nune’e hodi bele atende komunidade ka eleitor sira ne’ebé maka labele asesu mai to’o iha nivel munisipiu maibe bele hakat mai iha postu resensiamentu iha postu ida-idak. Difikuldade ne’ebé ita nia eleitor sira iha maka liliu konaba sertidaun RDTL ne’ebé maka afeta liu ba ita nia eleitor sira tanba atu trata sira nia kartaun eleitoral, rekezitus ida importante maka presija iha sertidaun RDTL no BI, hirak ne’e hotu maka ita nia eleitor sira barak seidauk iha, sira ne’ebé iha ona ne’e maka mai halo aktualiza iha postu resensiamentu postu ida-idak nian” nia informa.
Diretór STAE Munisipiu Covalima, Francisco Gusmão mos relata katak ajusta ba kartaun ba eleitor foun no tuan iha covalima dadaun ne’e atinji liu ona eleitor rihun sanulu resin ida.
Entretantu durante halo atualizasaun eleitoral mobel iha Postu Administrativu Fatululik, Fatumea no Fohorem, STAE Covalima deskobre komunidade barak mak harouk problema konaba seidauk iha sertidaun RDTL no Bilete Identidade (BI) hodi prejudika sira atu trata no atualiza sira nia kartaun eleitoral.
Jornalista : Julio Salinas
Editor : Chamot Nahac
