Covalima (RCCT) 20-08-25-Vise Ministru Obras Publika hamutuk ho Ekipa Teknika integradu ne’ebé hamohan an iha ministeriu obras publika vizita Munisipiu Covalima hodi monitoriza no halo avaliasaun ba projeitu hirak ne’ebé implementa iha Munsipiu Covalima.
Vise Ministru Obras Publika Júlio do Carmo, hatete katak liu husi monitorizasaun no avaliasaun iha terenu identifika kompañia implementador balu lentu hala’o projetu no mos Governante ne’e kestiona ho traballador sira nia kualidade servisu.
“iha terenu buat barak mak ita identifika maka hanesan ema sira ne’ebé mak servisu ne’e problema maka balu hatene servisu no balu lahatene servisu no depois kompañia sira mos lentu itoan, tanba problema durante ne’e iha suai udan hela deit entaun sira atu hakaas an para oinsa mak servisu lalais ne’e hanesan problema itoan mais komesa fulan agustu tesik mai la udan ona sira komesa servisu di’ak ona tanba suai la udan ona” Vice Ministru Obras Publika Júlio do Carmo, dehan.
Tan ne’e Vise Ministru Obras Publika husu ba kompañia implementador sira atu hala’o servisu ho kualidade nune’e garante utilidade ho durasaun ba tempu naruk. Nia mos apela ba kompañia implementador sira atu aselera projeitu tuir kontratu ne’ebé iha ona.
“Ita orienta ona sira katak sira tenki mobiliza sasan, rai henek, fatuk kerikil, tenki mobilaza iha fulan ida ne’e nia laran atu nune’e agustus ho setembru sasan sira tenki to’o ona iha lokasi nune’e iha tempu udan karik sira bele hala’o servisu udan itoan sira para udan para sira bele servisu fali tanba sira iha material se lae ne’e problema ne’e bo’ot” Governante ne’e Informa.
Vise Ministru Obras Publika akompaña husi ekipa tekniku integradu halo monitorizasaun no avaliasaun ba implementasaun projeitu iha Covalima, ne’e hahu husi Postu Administrativu Fatumea iha tersa feira no kuarta feira kontinua ba Fohorem, Fatululik no Maukatar, tuir planu sei kontinua ba Postu Administrativu Zumalai hodi observa direita implementasaun projeitu on going iha Munisipiu Covalima
Jornalista : Alfredo Barreto
Editor : Chamot Nahac
