Covalima (RCCT) 04-08-25-Ministeriu Agrikultura Pekuaria Peska no Floresta (MAPPF) iha ona planu atu servisu hamutuk ho setor hotu, liliu autoridade lokal sira hodi moderniza setor agrikultura, basa Munisipiu Covalima nudar baluk ida husi Nasaun Timor Leste ne’ebé iha potesialidade bo’ot ba setor agrikultura.
Ministru Agrikultura Pekuaria Peska no Floresta (MAPPF) Marcos da Crus, hatete governu sei esforsu hadi’a infraestrutura hodi apoiu setor agrikultura, hodi nune’e hamutuk ho lidera komunitaria no to’os na’in sira hodi dezenvolve setor agrikultura ida ne’ebé modernizadu.
“Suai la’os haree deit ba iha parte floresta mais hare mos ba iha parte agrikultura, tanba iha Suai rai luan, tan ne’e ita esforsu daudaun hamutuk ho entidades hotu ho ita bo’ot sira agrikultura no liderasansa kamunitaria ka xefe suku no xefe aldeia sira hotu hare oin nusa maka ita dezenvolve setor agrikultura, ita komesa buka atu moderniza ita nia agrikultura, ho hadi’a infraestrutura ne’ebé ita iha, karik informa ba malu katak iha Suai tinan ne’e komesa halo irigasaun bo’ot iha Aldeia Maukola, Suku Beko, no iha Tafara ita sei tau atensaun no sei halo estudu atu. Bele iha tempu oin mai bele halo konstrusaun ne’ebe di’ak” Ministru Agrikultura Pekuaria Peska no Floresta (MAPPF) Marcos da Crus, dehan lia ne’e ba komunidade sira iha Suku Suai-Loro foin lalais ne’e.
Governante ne’e mos husu ba animal na’in sira labele husi livre animal hodi estraga fali to’os ho natar komunidade nian.
“Suai mos iha potensialidade ba haki’ak animal, tanba ne’e hakarak aviza ba malu katak ita presija halo natar no to’os, ita presija iha animal hanesan karau mais buat rua ne’e ita tenke kuidadu atu sira na’in rua ne’e labele estraga malu fali, ita sosializa ona ho lideransa komunitaria sira konaba regra, konaba lei oin nusa maka kuidadu animal, tenke kesi, animal sira tenke iha luhan hodi nune’e nia labele afeta fali ba iha to’os ho natar, tanba hanesan ita hare ema barak husi Oebaba tesik mai ne’e lakohi halo natar ho to’os tanba animal sira ne’e maka estraga fali, tanba ne’e ita bolu atensaun ba malu katak animal mos ita presija to’os ho natar mos ita presija, buat sira ne’e la’o hamutuk presija halo jestaun ne’ebé di’ak hodi fo benefisiu ba ita” nia informa.
Ministru Agrikultura Pekuaria Peska no Floresta (MAPPF) Marcos da Crus, hatete rai iha Munisipiu Covalima iha potensialidade ba setor agrikultura hodi kontribui ba hasa’e produsaun rai laran, tanba ne’e husu komunidade hotu atu labele husik rai sira ne’e abandona, no husu komunidade haki’ak animal sira labele husik livre animal haki’ak hanesan, Karau, fahi no seluk tan nune’e limita animal sira atu estraga fali to’os ho natar.
Jornalista : Julio Salinas
Editor : Chamot Nahac
