Covalima (RCCT) 01-08-25-Adelino de Sousa, laran taridu wainhira nia kaben Esmenia Amaral ne’ebé sofre moras komplikadu la hetan rekomendasaun husi Ministeriu Saude hodi ba halo tratamentu saude iha estranjeiru.
Engkuantu hafoin alta husi Ospital Nasional Guidu Valaderes Dili, Adelino nia kaben, konsumu deit aimoruk herbal ne’ebé sira sosa rasik husi kupang Indonesia hodi aguenta. Maske nune’e Adelino nafatin tau fiar ba governu hodi husu atu hetan rekomendasaun nune’e bele lori nia kaben ba halo tratamentu iha rai liur.
“Doutor sira dehan ai moruk la iha nia moras ne’e no sira foti liman dehan labele kura dehan moras kanker ne’e ganas. Ha’u senti triste, dehan fali sira lahatene, haruka fila ba uma” Adelino konta.
Nune’e mos Esmenia Amaral, Adelino nia kaben ne’ebé sofre moras komplikadu, nafatin iha esperasaun hakarak rekopera husi moras ne’ebé nia sofre dadaun.
“Sira dehan tiroit ne’e iha pulmaun ona ne’ebé la bele kura ona, hasil husi scan ne’e dehan mai to’o ha’u nia pulmaun ona. Ha’u iha vontade atu di’ak, ha’u husu estadu atu ajuda. Ha’u atu ba Kupang maibe ho kondisaun toba deit hanesan ne’e ha’u senti labele,”Esmenia dehan.
Entretantu durante Esmenia Amaral toba deit iha uma no konsumu ai moruk herbal ne’ebé sira sosa rasik iha Kupang NTT, Indonesia, tanba ne’e familia nafatin husu ba governu liu liu ba Ministeriu Saude atu bele ajuda liu husi fo rekomendasaun hodi ba halo tratamentu saude iha estrajeiru.
Jornalista : Gabriel da Silva/Afredo Barreto
Editor : Chamot Nahac
