Covalima (RCCT) 29-07-25- Ministreriu Petrolio no Rekursu Minerais (MPRM), no Kompañia Internasional Woodside halo visita espesial mai Covalima hodi observa direta preparasaun Timor Leste nian ba planu projetu Tasi Mane ne’ebé relasiona mos ho dezenvolve mina iha kampu Greater Sunrise (GS).
Ministru Petrolio no Rekursu Minerais, Francisco da Costa Monteiro, hatete liu husi visita ne’e atu hatene kle’an konaba infraestrura ne’ebé governu Timor-Leste halo ona no planu saida ba projetu Tasi Mane ne’ebé ligadu ba iha dezenvolve Greater Sunrise, iha ne’ebé Covalima designadu ona ho Suai Supply Base.
“Ida ne’e fas parte visita ida para atu hatene infraestrutura saida deit maka TL harii ona no planu saida maka Timor-Leste iha em relasaun ho projetu Tasi Mane iha ligasaun mos ba posibilidade dezenvolve kampu Greater Sunrise nian, tanba komponente balu husi Tasi Mane nian ne’e iha nia ligasaun mos ho prosesu atu dezenvolve kampu Greater Sunrise, imi hatene governu iha nia planu lubuk ida, planu industrializasaun iha kosta sul no Covalima hanesan designadu ona atu harii Suai Supply Base. Ita iha ona airportu, ita iha Auto Estrada, agora ita atu ba ona iha prosesu Suai Supply Base ne’e rasik, katak sasan sira ne’e aban bainrua suporta atividades ne’ebé akontese iha tasi ne’eba liliu ba gas nian ne’e sei sai husi Suai, maibe haree mos fasilidade ne’ebé iha ona bele konsidera ne’e hanesan parte ida iha sira nia konsiderasaun, parte ida ba sira nia planu ba iha dezenvolve kampu Greater Sunrise ba futuru” dehan Ministru Petrolio no Rekursu Minerais, Francisco da Costa Monteiro.
Progresu konaba projetu Suai Supply Base, utra pasa ona prosesu lubuk ida ne’e dadaun ne’e iha ona faze ikus ba tenderizasaun hafoin kontinua ho konstrusaun.
“Prosesu lao maka’as tebes agora iha faze ikus ba tenderizasaun nian, dezenu inisial ona ona, bazeia ba ida ne’e maka kontratu ida ema bolu dehan DDF nian ne’e agora lao hela iha tempu badak ita espera katak buat sira ne’e hotu ona bele hahu dezenu datailus nian ne’e tanba Timor Gap halo tiha ona estudus lubuk ida iha ne’e, haree fasilidade balu harii ona iha ne’e fas parte husi estudus Sira ne’ebe lao tiha ona, ne’ebe husi baze ida ne’e maka agora lansa tiha ona, ne’ebe ita hein katak iha fin de tinan ida ne’e ou tinan oin Ita bele hahu konstrusaun daudaun ona” Ministru Petrolio no Rekursu Minerais, Francisco da Costa Monteiro, fundamenta.
Iha Vizita ne’e Ministru Petrolio no Rekursu Minerais, Francisco da Costa Monteiro, ne’ebé akompaña husi Prezidente TIMOR GAP.EP, Rui Soares no Autoridade Covalima hamotuk ekipa delegasaun husi Woodside hala’o enkontru iha Airportu Suai, hafoin remata enkontru halo vizita ba iha areador aeropotu suai. Kontinua observa konstrusaun uma ba komunidade afetadu ba aeroportu suai. Fafoin ekipa konjunta ne’e hala’o sorumut ho lia na’in sira iha Aldeia Fatuisin, remata husi ne’e ekipa kontinua hala’o visita area Suai Supply Base no visita ikus liu iha Ospital Referal Suai.
Jornalista : Julio Salinas
Editor : Chamot Nahac
