Covalima (RCCT) 29-07-25-Ministeriu Turizmu No Ambiente, liu husi Diresaun Nasional Marketing Turismu no Relasaun Internasional fo Formasaun digital marketing ba emprezariu sira nune’e bele hatete aproveita hodi promove produtu lokal sira liu husi meiu dizital iha Munisipiu Covalima.
Xefe Departamento Marketing no Relasaun Internasional, Elisabeth Florencia Jerónimo hatete liu husi formasaun ida ne’e atu hasa’e vendedor sira nia koñesimentu hodi halo promosaun ba sira nia Produtu Lokal no negosiu ki’ik sira hanesan Restaurante, Guest House liu husi media sosial
“Ami nia aktividsades ba formasaun digital marketing ne’e iha ne’e planu anual diresaun ninian be’ebé mak preve ona iha orsamentu 2025 nian, ami nia foremasaun ne’e tarjetu ba partisipante sira ne’ebé mak kompostu husi na’in ba restaurante, na’in ba guest house, na’in ba grupu traballador, rekursu komunitariu iha suai loro. Objetivu husi formasaun ida ne’e mak atu fo kuñesimentu ba ita nia vendedor sira atu oinsa halo promosaun liu husi media sosial” Xefe Departamento Marketing no Relasaun Internasional, Elisabeth Florencia Jerónimo hatete.
Prezidente Assosiasaun Emprezariu Covalima, Aurelia Doutel Sarmento Vong, konsidera formasaun partenente tebes ba sira hodi halo promososaun ba sira nia atividade negosiu liu husi media sosial.
“Sim iha ne’e, ami presija duni, tanba ami hanesan emprejariu hanoin halo guest house, hanoin halo restaurante, hanoin halo kriativu hamosu aktividade oioin liu husi fahe liman, ida ne’e ami presija duni tanba liu husi era dijital agora ita bele promove saida mak ita produz rasik iha ita nia rai laran, Ami hatene katak liu husi facebook, tik tok, maibe ami lahatene oinsa nia dalan atu promove buat sira ne’e. Liu husi formasaun ida ne’e ami presija tebtebes atu iha loron tolu ida ne’e ami bele uza oportunidade atu bele oinsa hanorin ami uja media sosial hodi promove hotel ho restaurant ne’ebé mak ami iha” Nia dehan.
Entretantu formasaun digital marketing ba emprezariu sira ne’e sei hala’o durante loron tolu, hahu tersa ohin iha salaun IADE Munisipiu Covalima no sei remata iha Quarta feira semana ne’e.
Jornalista : Alfredo Barreto
Editor : Chamot Nahac
