Covalima (RCCT) 16-07-25-Governu liu husi Sekretaria Estadu Kooperativa estabelese ona Federasaun Multi-Cooperativa RIN HITU COVALIMA (FMC-RHC) iha Munisipiu Covalima ho membru hamotuk ema na’in 624 kompostu husi feto hamutuk na’in-335 no mane na’in-289, ho total fundus ne’ebé iha hamutuk dolar amerikanu rihun atus rua ualu, atus sia hat nulu resin rua sentavus rua nulu ($ 208, 942.20).
Ho ida ne’e Prezidente Federasaun Multi-Cooperativa RIN HITU COVALIMA (FMC-RHC) Benjamin da Costa, hatete durante ne’e federasaun seidauk iha edifisiu atu utiliza hodi hala’o servisu, tan ne’e nia husu ba SEKoop no Autoridade Munisipiu atu bele kontinua ajuda oferese fatin ba Federasaun.
“Federasaun provizoriu iha sede koperativa primaria tanba ne’e hakarak husu apoiu autoridade Munisipiu Covalima no mos SEKoop Munisipiu no Nasional karik fatin mamuk balu iha bele oferese netik mai ami federasaun atu bele uza, husu mis ba oha SEKoop atu nafatin hasa’e rekursu membru federasaun nian entermus formasaun no estudu komprativu no mos apoiu material eskritoria hodi halo servisu ba federasaun nian, husu ba SEKoop katak koperativa primaria sira ne’ebé atu rejistu ka hato’o pedidu ruma presija konsidera ba federasaun ne’ebe maka hamrik ona iha Munisipiu” Prezidente Federasaun Multi-Cooperativa RIN HITU COVALIMA (FMC-RHC) Benjamin da Costa, dehan.
Sekretariu Estadu Kooperativa Arsenio Pereira da Silva, husu ba autoridade Covalima atu fo konsellu ba Federasaun Multi-Cooperativa RIN HITU Covalima (FMC-RHC), nune’e mos governante ne’e husu ba Lideransa no membru federasaun tenke servisu hamutuk no labele kontra prinsipiu estrutura federasaun nian.
“Iha biban ida ne’e hakarak husu ba Autoridade Munisipal para bele fo mos konsellu ba sira liliu federasaun ne’ebé foin existe no mos primaria sira ne’ebé existe ona no ita SEKoop liliu funsionariu destakadu sira labele ohin ita mai fo pose, aban federasaun ne’e laiha ona ida ne’e ha’u lakohi, ita rasik maka mai fo pose ita rasik maka kontra prinsipiu koperativa maibe tenki iha nia sustentabilidade” governante ne’e dehan.
Sekretáriu Estadu Kooperativa Arsenio Pereira da Silva, hatete Timor-Leste iha potensialidade iha rai, tasi no bee bele sustenta ekonomia rai laran. Governante ne’e fundamenta liu husi koperativa hasa’e produsaun rai laran no bele hetan rendimentu hodi sustenta ekonomia familia.
Jornalista : Julio Salinas
Editor : Chamot Nahac
