Ainaro (RCCT) 09-07-25-Ministeriu Koordenador Asuntu Ekonomia (MKAE), kontinua divulga ba autoridade sira iha Munisipiu Ainaro konaba esforsu governu Timor Leste hodi hetan susesu sai membru ba Organizasaun Mundial Komersiu (OMK).
Teknika Organizasaun Mundial Komersiu, Joanita Bendita da Costa Jong, informa katak prosesu ne’e lori tempu durante tinan tolu resin Timor Leste sai nudar observador, hafoin konsege finaliza komitmentu ikus iha fulan febreiru 2024, liu husi enkontru ministerial XIII iha Abu Dhabi disidi timor leste sai membru OMK nudar membru ba da 166.
“Hare konaba TL Nia intensaun liu ita nia governu, husi governu anterior sira hotu hahu ona hahu ona prosesu haruka ita nia karta intensaun atu sai mos membru, no mos iha tinan-3 ho balun ita sai observador hahu iha 2015 mai ne’e komesa prosesu ne’e la’o, ita konsege finaliza hotu komitementu sira ne’e, no hahu iha Fevereiru 2024 liu husi enkontru ministerial iha Abu Dhabi ba dala XIII nian maka ita sai ona ba membru 166, maibe iha nasaun barak agora daudaun iha prosesu nia laran atu sai membru OMK, sira agora sei sai hela observador, ita TL orgullu ba governu hotu-hotu hahu governu anterior mai to’o governu da sia halo esforsu maske ho nasaun ki’ik maibe prosesu badak liu, ne’e tanba ita nia parseiru ba negosiu ne’e uitoan la hanesan nasaun bo’ot sira ne’e nia parseiru barak, benefisiu maka merkadu global husi nasaun 166 ne’e Ita Nia merkadu global ne’e ba 165 ne’e ita bele asesu” Informa Teknika Organizasaun Mundial Komersiu, Joanita Bendita da Costa Jong, ba jornalista hafoin Ministeriu Kordenador Asuntu Ekonomia (MKAE) kontinua divulga informasaun ba Autoridade sira iha Munisipiu Ainaro konaba pos adezaun Timor-Leste nian ba Organizasaun Mundial Komersiu (OMK) Kuarta (09/07).
Iha diskursu Prezidente Autoridade Munisipiu Ainaro Manuela Goergina Carmo Bukar Corte- Real, hatete desizaun governu hola parte iha organizasaun mundial ne’e responsabilidade ema hotu nian tantu komunidade, autoridade lokal hahu nivel aldeia to’o iha Munisipiu tenke servisu maka nune’e bele fo benefisiu ba Timor-Leste ne’ebé hola parte ona iha organizasaun Mundial Komersiu nian.
“Ita hotu tenke desizaun governu nian atu hola parte iha organizasaun internasional sira ne’e, saida maka ita tenke halo, kuandu governu nia desizaun ita hola parte iha organizasaun ida responsabilidade hanesan komunidade moris iha nasaun ida saida maka ita tenke halo para depois ita nia partisipasaun iha organizasaun sira ne’e bele fo benefisiu mai ita, tanba ne’e maka governu liu husi MKAE mai desimiña informasaun konaba OMK, ha’u fiar setor privadu sira atu rona didiak papel importante saida maka hanesan setor privadu iha organizasaun mundial ne’e, papel governu nian ita hatene ona regulador, maibe ida halimar iha terenu emprezariu ka setor privadu, maibe ida ne’e responsabilidade la’os deit emprezariu mesak ita hotu nia responsabilidade ba Munisipiu Ainaro saida maka tenke prepara nune’e setor privadu hakat ba oin hodi konta mos Ainaro ne’e” nia dehan
Semana ne’e Ministeriu Kordenador Asuntu Ekonomia (MKAE) kontinua divulga informasaun konaba pos adezaun timor leste ba OMK ba Autoridade sira iha Munisipiu Ainaro no semana oin atividade refere sei kontinua hala’o iha munisipiu sira ponta Leste nian. Engkuantu atividade divulgasaun ne’e sei kontinua hala’o to’o fulan dezembru 2025 no taka iha Oekusi.
Jornalista : Julio Salinas
Editor : Chamot Nahac
