Ainaro (RCCT) 09-07-25-Prezidente Autoridade Munisipal no Konsellu Veteranu Munisipiu Ainaro triste rona ema husi Munisipiu seluk lori malu ba oho feto ida no soe iha Jakarta2, area juridiku Ainaro.
Tuir Prezidente Interinu Konsellu Kombatentes Libertasaun Nasional Munisipiu Ainaro, Sebastião Castro Pereirra “Kakatua” konfesa dehan kazu omesidu ne’e konsidera hafoer naran fatin istoriku Jakarta2 no Munisipiu Ainaro.
“Relasiona ho problema ne’ebé foin dadauk akontese, hanesan Veteranu sente triste tebes, la hatene situasaun ne’e mosu husi ne’ebé, bele mai destroi tiha fatin ne’ebé ema bolu dehan Jakarta-2, ema barak la komprende. Jakarta-2 ne’e iha istoria, ema lubuk ba soe iha ne’eba maka hodi hetan ukun an ida ne’e, hanesan Veteranu laran susar tebes oinsa feto ida ho mane ida, sira na’in-2 mai husi Likisa hotu, mais la hatene tanba saida maka mai monu loos iha Jakarta-2 ne’e, tanba ne’e hanesan Veteranu triste tebes, laran susar hanesan ne’e ema husi munisipiu seluk mai hakarak estraga naran Munisipiu Ainaro, liliu fatin Jakarta-2 sai fatin istoria ida mos husi ukun rasik an Ida ne’e hotu” Prezidente Interinu Konsellu Kombatentes Libertasaun Nasional Munisipiu Ainaro, Sebastião Castro Pereirra “Kakatua” ba jornalista iharesinto Administrasaun Munisipiu Ainaro, Kuarta (09/07).
Nune’e mos tuir Prezidente Autoridade Munisipiu Ainaro, Manuela Goergina Carmo Bukar Corte- Real, hatete hanesan feto ida sente triste bainhira rona novidade katak mane ida oho feto maluk ida iha Ainaro Jakarta-2 nian. No nia mos husu ba Autoridade Justisa atu halo prosesa hodi kondena suspeitu ho kastigu tuir lei ne’ebé vigora iha Timor Leste.
“Ita hotu hakfodak, kuandu iha loron 6 foin lalais komunidade hetan mate isin ida ne’ebé soe hela Builiko. Ita nia alin ida mai husi Likisa ho tinan 23, maibe hakarak hatete deit katak ema ida ne’ebé halo aktus hasoru alin feto ne’e laiha sentimentu umanunidade, tanba ita nia alin feto ne’e identifika katak nia gravida hela signifika katak ita la’os oho ema ida deit maibe oho ona ema na’in-2 nia vida, hanesan feto ida triste no nafatin husu ba autoridade seguransa no mos ita nia Tribunal sira konta konaba lei medidas ida ne’ebé adekuadu ho nia hahalok, ita hakarak fo hanoin deit katak ema nia vida ne’e valor tebes, ita labele hanoin hanesan animal oho laiha valor, tanba ne’e mai hanesan inan ida, hanesan feto ida husu hotu-hotu atu respeita vida ne’e” dehan PAM Ainaro Manuela Goergina Carmo Bukar Corte- Real.
Antes ne’e, Iha loron 06 fulan Jullu tinan 2025, hale’u tuku 11, komunidade informa ba Polisia Munisipiu Ainaro katak sira hetan mate isin ida hamutuk ho nia motor inklui ekipamentus balun iha area Jakarta2 (Builiko). Nune’e parte seguransa to’o kedas iha fatin akontesimentu no halo identifikasaun.
Liu tiha ne’e, Servisu Informasaun Polisia (SIP), Servisu Investigasaun Kriminal hamutuk ho Komandu PNTL Munisipiu Ainaro, Komandu PNTL Munisipiu Likisa, kontinia halo kedas tracking hodi rekolla informasaun no ikus mai iha loron ne’e kedas (06/07) iha orastuku 09:00 kalan, Ekipa kaptura kedas Suspeitu ho inisial MMS iha Munisipiu Dili area Dom Aleixo ninian.
Nune’e iha loron 08 fulan Jullu 2025 Tribunal Judisiál Primeira Instánsia Suai (TJPIS) ne’ebé prodizi husi Dra. Patrícia de A. F. B. M. Xavier, hala’o julgamentu primeiru intregatoriu ba Kazu Omesidu Agravadu ne’e. no iha loron 09 fulan Jullu TJPIS Aplika Medida Koasaun Prizaun Preventiva ba Arguidu MMS hodi kontinua ba investigasaun tuir mai basa deskonfia arguido MMS oho Peregrina iha Jakarta-2, Ainaru.
Komete Krime Omisídiu Agravadu iha Kódigu Penál 139 alinea f, no moldura penál sei hetan pena prizaun tinan 12 to’o tinan 25.
Jornalista : Julio Salinas
Editor : Chamot Nahac
