Covalima (RCCT) 01-07-25 Servisu Saude Munisipiu Covalima konvoka reuniaun ho pesoal saude sira husi Sentru Saude (SS) hotu no mos pesoal importante sira husi servisu Munisipal Edukasaun Covalima hodi halo advokasia relasiona ho Vasina HPV no Covid-19 ba estudante no labarik sira ne’ebé ho otas tinan 11-14 iha Munisipiu Covalima.
Xefe Programatiku Saude Munisipiu Covalima, Rui Amaral dehan aktividades ne’e hanesan preparasaun molokk kontinua ba vasina HPV ho Vasina Covid-19 ba labarik sira iha eskola hotu hotu iha Covalima.
“Ami halo aktividades ida ne’e tanba ho razaun atu preparasaun ba vasina ba labarik sira ne’ebé ho tinan 11-14 iha eskola hotu hotu. Ida ne’e mak asuntu primeiru no asuntu ba segundu ko’alia konaba moras rabias, tanba Covalima iha ona kazu surtu ne’ebé akontese, entaun ho razaun sira ne’e maka ami ohin loron hasoru iha ne’e ho inspetur sira ho xefe sentru saude sira no mos pessoal saude sira no informasaun sira ne’ebé mak fahe hanesan ba inspetur no diretóra edukasaun Covalima liga ba vasina ba ita nia oan sira iha eskola hotu hotu iha Covalima vasina HPV ho vasina Covid 19” Hatete Chefe programatiku Saude Munisipiu Covalima Rui Amaral
Iha fatin hanesan reprezenta Servisu Munisipal Edukasaun Munisipiu Covalima, Benedito Asa dehan parte Edukasaun sei kolabora ho saude hodi halo vasinasaun HPV no Covid-19 ba estudante sira iha eskola.
“Relasan ho enkontru ohin advokasia husi Eervisu Saude Munisipal nian ne’ebé foka liu asuntu ba vasinasaun ba HPV no Covid 19 ne’ebé parte husi Edukasaun nian espera katak aktividade ne’e bele la’o ho di’ak liliu vasinasaun ne’e halai liu ba ita nia labarik ki’ik oan sira iha eskola nivel sekundaria ho nune’e edukasaun oferese tomak dadus ba sira saude hodi hala’o atividade no mos kolabora no servisu hamutuk liliu liu husi kordenasaun ne’ebé di’ak hodi nune’e atividade ne’e la’o ho masimu ho rezultadu ne’ebé ita hotu hakarak. Total eskola hanesan ohin temi ona katak eskolak lubuk husi Ensinu Basiku Primeiru Siklu ho segundu siklu, terseiru siklu ba to’o sekundaria Tekvok. Atividade ne’e tinan hirak liu ba mos halo ona vasina ne’ebé vasinasaun agora ne’e hanesan kontinuasaun deit aktividades sira ne’ebé iha tempu liu ba sira implementa ona” Benedito Asa, dehan.
Entretantu atividade advokasian ne’e foka liu konaba Vasinasaun HPV no Covid-19 ne’ebé hala’o iha salaun Polo Covalima, Partisipa husi inspetur eskolar sira, Xefe Sentru Saude inklui Pesoal Saude sira.
Jornalista : Alfredo Barreto
Editor : Chamot Nahac
