Covalima (RCCT) 27-06-25-Sekretariu Estadu Formasaun Profesional no Empregu (SEFOPE), liu husi Diresaun Jeral Formasaun no Empregu no Diresaun Nasional Empregu realiza atividade feira kareira no edukasaun ba estudante Ensinu Sekundaria Jeral no Ensinu Sekunkaria Tekniku Vokasional sira iha Postu Administrativu Tilomar, Munisipiu Covalima ho tema “Atinje futuru brilliante liu husi asesu informasaun kareira rede profesional, formasaun vokasional edukasaun no programa servisu iha rai laran no rai liur”.
Tuir Reprezentante SEFOPE, Jacinto Ribeiro Dias, le diskursu SEFOPE nian ba estudante sira ne’ebé partisipa iha feira ne’e hatete expozisaun ne’e hanesan planu governu nian atu hakbesik informasaun ba komunidade liliu ba estudante sira baze.
“SEFOPE kria feira kareira no edukasaun ida ne’e hanesan expozisaun ida hodi hatutan deit hanoin hakbesik no dada informasaun ne’e ba ema hotu liliu ba estudante sira, feira ida ne’e hanesan parte oportunidade ida hodi hakbesik informasaun ba sira, tanba ne’e SEFOPE nia parte kria formasaun tantu rai laran nian no mos rai liur nian maibe hahu uluk ho formasaun no informasaun” Reprezenta SEFOPE atual Xefe Gabinete SEFOPE, Jacinto Ribeiro Dias. Informa.
Reprezenta Prezidente Autoridade Munisipal, atul Diretór Servisu Munisipal Rekursu Humanus, Jose Manuel Gonçalves, hatete Jerasaun foinsa’e sira maka rikusoin ida ne’ebé iha valor ba nasaun ida ne’e no sira maka susesor dezenvolvimentu nasaun ida ne’e nian.
“Jerasaun foinsa’e sira maka rikusoin ida ne’ebé iha valór ba nasaun ida ne’e no sira maka susesor dezenvolvimentu nasaun ida ne’e nian, inovador sira no atu sai lider ida ne’ebé di’ak iha futuru, tanba ne’ e importante tebes ba ita atu fo oportunidade luan ba sira atu dozenvolve sira nia potensial, tantu liu husi edukasaun no oportunidade serbisu ne’ebé produtivu. Ita tama ona ba globalizasaun no dezenvolvimentu teknolojia ne’ebé lalais, dezafiu no oportunidade mosu oioin deit jerasaun foin-sa’e sira tenke bele adapta, hadi’a sira nia kompetensia, no aproveita oportunidade oi-oin ne’ebé iha atu hetan susesu no prosperidade.” Jose Manuel Gonçalves, dehan.
SEFOPE realiza feira karreira no edukasaun ne’e ho objetivu husi feira kareira no edukasaun ne’e maka atu hakbesik liu informasaun ba foinsa’e sira liliu ba estudante nivel sekundaria sira.
Jornalista : Julio Salinas
Editor : Chamot Nahac
