Covalima (RCCT)-25-06-25-Liu husi Perkija ne’ebé Centro Comunidade Covalima (CCC) halo durante ne’e hetan rezultadu iha feto barak mak assume kargu iha instituisaun publiku Governu nian no provada inklui feto na’in ida maka eleitu nudar xefe suku iha Munisipiu Covalima.
Diretór Centro Comunidade Covalima, Alberto de Jesus Barros, rekuñese programa Dezenvolvimentu Feto Rural ne’ebé durante ne’e CCC hala’o hodi kapasita no motiva feto sira kompete ho mane sira iha eleisaun, fo rezultadu hatudu iha peskiza hatudu katak balansu jeneru akontese duni iha Covalima ne’ebé governu timor leste fo apresiasaun.
“Centro Comunidade Covalima halo kapasitasaun bar-barak ba iha feto sira ne’ebé ita bolu feto potensial, ita sei lembra karik iha eleisaun pasadu sira feto mos barak kandidata-an ba iha xefe aldeia, xefe suku hodi kompete ho mane sira. Hatudu duni igualdade jeneru iha Munisipiu Covalima no ikus mai ita mos hetan agradese husi governu liu husi Sekretaria Estadu Igualdade no Ministeriu Administrasaun Estatal fo parabens ba Covalima. CCC iha komitementu identifika fila fali feto sira ne’ebé hetan kapasitasaun agora paradeiru iha ne’ebé, ita hotu orgullu Covalima iha mudansa bo’ot kompara ho tinan hirak liu ba kotu feto asumi kargu menus liu, ho situasaun ida ne’e maka CCC tau planu prioridade haforsa feto ba igualdade jeneru nian, maka ohin loron ita ba vizita edifisiu instituisaun governu nian, ONG feto barak maka sai diretóra, sai xefe departamentu, feto barak sai xefe aldeia no feto ida sai xefe suku” Diretór Centro Comunidade Covalima, Alberto de Jesus Barros, dehan.
Diretóra Servisu Munisipal Apoiu Organizasaun Não Govermentais no Organizasaun Komunitaria, Maria de Jesus Pereira, relata katak iha Munisipiu Covalima hamotuk feto na’in hat mak asumu kargu hanesan Diretóra iha Servisu Administasaun Munisipal.
“Peskiza ne’ebé ita nia maluk sira hala’o iha tinan 2024 liu ba rezultadu hatudu ba feto maluk sira ne’ebé agora asumi kargu, ne’ebé husi parte munisipiu iha tinan 2024 servisu munisipal sai nudar diretora ami feto na’in-4 hanesan diretóra jestaun merkadu, diretóra finansas, diretóra edukasaun no ha’u rasik nudar diretóra apoiu sosiedade sivil, ita mos iha xefe departamentu husi servisu munisipal, delegasaun teritorial, iha mos diretóra ONG, dala ruma mos iha kordenadora” nia dehan.
CCC hala’o peskiza bazeia ba kapasitasaun ne’ebé molok ne’e fo on aba feto sira konaba lideransa ninian nune’e bele halo kompetisaun ho mane sira iha eleisaun sira ne’ebé liu dadauk ona. ikus mai rezultadu hatudu feto Covalima barak maka asumi kargu xefia iha instituisaun estadu nian, sai xefe aldeia no iha feto ida maka sai xefe suku.
Jornalista : Julio Salinas
Editor : Chamot Nahac
