Covalima (RCCT) 25-06-25-Governu liu husi Ministeriu Petrólu no Rekursu Minerais (MPRM) hamutuk ho Komisaun Funsaun Publika (KFP) no Inspesaun Jeral Estadu (IGE-Sigla Portugues), Realiza Reuniaun Regular ba segundu trimestral tinan 2025 ho tema reforsa kuñesimentu no abilidade kontribui ba garante kualidade no jestaun di’ak ba funsionamentu instituisaun publika” ho inspetur no auditor sira husi liña ministeriais hodi aprezenta no identifika lakunas sira ne’ebé durante ne’e sira infrenta.
Komisáriu Asuntu Disiplina husi KFP, Agapito da Conceição hatete inspetur no auditor sira nia servisu maka atu halo monitizasaun no kontrullu servisu tomak iha liña ministerial.
“Hanesan ita hotu hatene katak atividade ida ne’e ita realiza ho objetivu maka atu partilla ba malu situasaun relevante ho asuntu kontrolla interna ida idak nian, ministeriu ka ajensia sira. Inkontru ida ne’e prinsipal, tanba para ita hodi hatene katak dezafius, lakunas ne’ebé to’o agora ita nia auditoria, inspetoria no liña ministerais sei iha difikuldade lubuk ida no regulamenstus no lei sira ne’ebé maka komesa husi 2002 to’o agora presiza atu ita identifika lakunas sira ne’ebé mak ladun relevante ho governasaun ida ne’e ita persiza aproveita,” Komisáriu Asuntu Disiplina husi KFP, Agapito da Conceição, esplika.
Aleinde ne’e Inspetur Jeral Estadu, Franscisco de Carvalho husu ba inspetur no auditor sira husi liña ministeriais hotu atu halo servisu maka’as hodi evita korupsaun no aktu iresponsavel ne’ebé akontese iha instituisaun publika sira.
“Ita bo’ot sira hare tok tanba sa mak kareta sira ne’e la iha dokumentus, ne’e ha’u hanoin katak ita servisu iha funsionariu ida mak halo hanesan ne’e ladun los ne’bé husu ba DG sira, husu ba patrimoniu estadu nian, kordena ho KAK, nusa mak sira fo kareta ne’e ba ema ne’e, ha’u hanoin katak la los iha ne’e, ita nia ne’e autoridade munisipiu mak iha ne’e ami nia ekipa seidauk tama mai Covalima, balu ba munisipiu seluk hanesan Lospalos ho munisipiu seluk, ita nia ekipa komisaun saude nian, KAK nian sira halo inspesaun iha ne’eba ne’e, Covalima ne’e aban bainrua bele mos mai derepente iha ne’e ami labele hatete sai tanba ne’e derepente deit ba ita bo’ot sira nia instituisaun sira ne’e tanba ne’e segredu sira nian tanba ne’e fo hanoin ba malu ba” husu Inspetur Jeral Estadu, Franscisco de Carvalho, dehan.
Reprejenta Ministru Petrólu no Rekursu Minerais (MPRM) Inspetur, Augusto Barreto esplika liu husi enkontru reuniaun regular ba inspetur no auditor sira husi entidade setor publiku ne’e atu reforsa kuñesimentu no abilidade hodi kontribui garante kualidade no jestaun di’ak ba funsionamentu instituisaun publiku sira.
“Ohin loron ita ko’alia konaba reforsa kualidade auditoria, tau importante nudar auditoria inspetur sira no kolega sira importante ita atu apar prosesu sira ne’e, entaun husu ba ita hotu hotu atu apar didi’ak husi hahu to’o ninia rohan no mos ita ko’alia konaba projetu entaun ita konvida ita nia orador importante husi AND sei aprezenta konaba prosesu fiskalizasaun ba iha projetu hotu hotu” Reprejenta Ministru Petroleu Rekursu Minerais (MPRM) Inspetur Augusto Barreto, espliaka.
Atividade Reuniaun regular ne’ebé organiza husi MPRM konaba hasa’e kuñesimentu no abilidade hodi kontribui kualidade jestaun ba Funsionamentu Instituisaun Publiku sira ne’e hala’o iha Salaun Administrasaun Munisipiu Covalima, ne’ebé hetan partisipasaun husi Inspetur Jeral Estadu, Komisaun Funsaun Publiku inklui inspetur no Auditor sira husi liña ministeriais hotu iha Timor- Leste tomak.
Jornalista : Alfredo Barreto
Editor : Chamot Nahac
