Covalima (RCCT)19-06-25- Asosiasaun Jornalista Timor Lorosa’e (AJTL) ne’ebé halo Parseiru ho United Nations Educational, Scientific and Cultural Organization (UNESCO) iha Timor Leste realiza formasaun ba jornalista sira hodi eleva kuñesimentu halo kobertura konaba asuntu mundansa klimatika.

Prezidente AJTL Zevonia Viare dehan UNESCO kolabora ho AJTL, kontinua haforsa no enkoraja jornalista sira halo reportajen ida ne’ebé klean liu ba mundansa klimatika ne’ebé akontese iha timor tomak.

“UNESCO kolabora ho AJTL hodi kontinua haforsa jornalista sira oinsa halo reportajen k’lean konaba klimatika ne’ebé mak akontese iha timor tomak liliu ba mos illa ki’ik oan sira ne’ebé mak afeta makas iha Timor Leste. AJTL ninia intensaun no interese mak oinsa mak enkoraja jornalista sira atu kobertura ba asuntu klimatika ne’ebé mak fo risku barak ba iha sosiedade liliu ba ema vulneravel sira, feto no labarik sira no mos ho ema difiseinte sira ne’ebé mak hela iha area remotas sira” Prezidente AJTL Zevonia Viare,dehan.

Zevonia fundamenta katak iha projeitu ne’e AJTL sei enkoraja Jornalista sira aatu elabora istoria konaba Mudansa Klimatika no sei hetan apoiu fundu ki’ik husi UNESCO iha Timor Leste.

“Husi treinamentu ida ne’e sei enkoraja kolega sira hamutuk sanulu resin sia mai husi plataforma oioin no mos sira sei kolavora hamutuk hakerek istoria no hetan fundus kiik oan UNESCO atu apoiu sira nia kobertura, ida ne’e importante maka isu sira ne’ebé mak fo sai meiu Ambiental, entaun iha loron rua ne’e treinador husi Jakarta nian ida ne’ebé maka tinan barak nia laran fo treinamentu ba jornalista meiu anmbiental halo diskusaun k’lean  ba kolega jornalista sira atu ratifika isu sira ne’ebé mak importante, ida ne’e mak AJTL nia esperansa hamutuk ho UNESCO atu hasa’e persentajen kobertura asuntu ambiental iha timor leste. Dala barak ita hare asuntu enventual deit wainhira ita   komemora loron oceano ita hotu hotu ba intervista governu konaba atividade ne’e maibe ita rasik seidauk iha inisiativa rasik husi redasaun oinsa mak ba ke’e asuntu sira ne’ebé mak ema barak hasoru maibe ita seidauk tau atensaun masimu seriu ba iha ne’eba” Zevonia dehan.

Atividade Treinamentu konaba mudansa klimatika ne’e partsipa husi jornalista sira hamotuk ema na’in 19 ne’e AJTL realiza iha salaun Yayasan HAK Farol Dili durante loron rua, hahu sexta no remata iha sabadu semana ne’e. Engkuantu atividade ne’e realiza tanba hetan apoiu fundus husi UNESCO iha Timor Leste.

Jornalista : Alfredo Barreto

Editor : Chamot Nahac