Covalima (RCCT) 05-06-25-Estudante liu na’in rua to’o tolu tenki tur hamotuk iha kadeira ida hodi tuir prosesu aprendizajem iha Eskola Basiku Filial (EBF) Labarai, tanba durante eskola infrenta manus kadeira no meja.
Ho ida ne’e maka Koordenador EBF Labarai Alcino Barros, esplika katak kadeira no meja iha ninia eskola badak maka kondisaun ladi’ak ona atu utiliza hodi fasilita prosesu aprendizajem ba estudante sira.
“Durante ne’e ha’u hanesan koordenador eskola nia preokupasaun maka hanesan kadeira ho meja lato’o, ha’u nia total alunus hamutuk ema na’in-261, maibe tanba problema kadeira ho meja iha sala ida sira na’in-2-3 bele tur hamutuk iha kadeira ida ho meja ida hodi tuir prosesu aprendisajem, ho problema ida ne’e ha’u hato’o ona ba iha Ministeriu Edukasaun maibe rezultadu laiha nafatin, tan ne’e liu husi reuniaun komunitaria ida ne’e mos ha’u nafatin hato’o Administrador Postu Administrativu Suai konaba kadeira ho meja eskola ida ne’e infrenta” Koordenador Eskola Ensino Basiku Filial Labarai Alcino Barros, ba RCCT hafoin partisipa reuniaun komunitaria ne’ebé hala’o husi Administrador Postu Administrativu Suai, ho Xefe Suku no Konsellu Suku Labarai iha Sede Suku Labarai, Kintal (05/06).
Relasiona ho preokupasaun ne’e, Administrador Postu Administrativu Suai, Ildefonso Maria Amaral, toma nota no sei hato’o problema refere ba Prezidente Autoridade Munisipiu no Servisu Munisipal Edukasaun Covalima atu hodi bele toma atensaun ba asuntu ne’e.
“Iha reuniaun komunitaria ida ne’e mos hetan partisipasaun husi koordenador eskola EBF ho EBC hodi hato’o sira nia preokupasaun, hanesan menu manorin na’in, iha eskola, balu kadeira ho meja at ona no husi problema hirak ne’e maka ha’u ata rasik sei halo relatoriu ba iha PAM mos hato’o ba iha Servisu Munisipal Edukasaun Covalima atu nune’e toma nota ba problema ne’ebé akontese iha eskola sira” APA Suai Informa.
Tuir koordenador EBF Labarai Alcino Barros, relata katak alende hasoru problema kadeira no meja. daudaun kondisaun edifisiu eskola ne’e komesa at ona. Iha plafon leten, ai no triplex komesa lahuk no barak maka monu ona. Tanba ne’e la seguru ona ba estudante hamotuk 261 no mestri sira atu hala’o prosesu aprendizajem wainhira iha tempu udan no mos anin.
Jornalista : Julio Salinas
Editor : Chamot Nahac
