Covalima (RCCT) 03-06-25-Iha impozisaun diviza ba membru sira iha Covalima, Komandante Polisia Unidade Patrullamentu Fronteira (UPF) Superientendente Polisia, Euclides Belo, informa katak iha tempu badak sei reajustamentu estrutura polisia UPF nian bazeia ba diviza ne’ebé sira ida idak simu ona.
Tanba ne’e Superientendente Polisia, Euclides Belo, husu ba membru sira atu simu ho responsavelidade wainhira simu ordem kolokasaun husi komandu.
“Semana oin sei halo reajustamentu estrutura UPF nian, tuir devisa ne’ebé ita simu, fo hatene ba kolega sira, komandante kompañia, komandante Postu, Segundu Komandante Postu no kolega sira hotu responsabilidade ne’ebé komando fo ba ita ne’e simu tau deit iha bolsu, depois reajusta ne’e halo mudansa husi Suai ba fali iha Oesilo, prontu para simu, tanba ne’e responsabilidade, Oekusi mai fali Suai hanesan mos, tanba ne’e maka hotu-hotu apartir tula ona devisa responsabilidade simu kualker Ordem ne’ebé maka fo sai kumpri ida ne’e, laiha ida maka ba servisu iha ema nia rain, hanesan la ba servisu iha Atambua ka Kupang, maibe hala’o servisu iha ita nia rain fronteira Timor-Leste, tanba ne’e tenke orgullu” komandante Unidade Patrullamentu Fronteira (UPF) Superientendente Polisia, Euclides Belo, deklara iha nia intervensaun hafoin remata tula devisa ba membru UPF na’in-42 iha Covalima, Tersa (03/06).
Komandante Polisia Unidade Patrullamentu Fronteira (UPF), Superientendente Polisia, Euclides Belo, mos husu ba membru sira hotu atu hala’o k’nar tuir ambiente servisu UPF nian ho di’ak iha liña fronteira.
“Dala ida tan hakarak nafatin fo hatene kolega sira impozisaun devisa ita tula ona ne’e responsabilidade tenke liga ho ita nia ambiente servisu ne’e tenke liga ho di’ak, labele iha lamentasaun husi ita nia komunidade, internal ita nian, nune’e mos external ligasaun ho ita nia parseiru sira servisu mos fo seguransa iha nasaun viziñu, ita tenke kria ambiente ne’ebé maka di’ak iha servisu fatin ne’ebé ita iha bele husik momoria di’ak, labele kuda aitarak barak ba servisu fatin, di’ak liu ita kari masin midar halo barak para depois ema sei amigu di’ak ho ita, ida ne’e maka orientasaun ne’ebé komandu orienta” dehan Komandante UPF Euclides Belo.
Superientendente Polisia, Euclides Belo, kontinua apela ba membru sira ne’ebé tula ona devisa atu toma responsabilidade hodi hala’o servisu tuir Ordem ne’ebé komandu orienta, labele abandona servisu, hodi asegura liña fronteira.
Jornalista : Julio Salinas
Editor : Chamot Nahac
