COVALIMA (RCCT) 21-05-25-Lideransa Suku no Autoridade Postu Administrativu Fohorem husu ba Institututu Jestaun Ekipamentu (IGE-Sigla Portuguesa) atu normaliza estrada diresaun Postu Fohorem liga ba kapital Munisipiu ne’ebé hetan estragus husi Dazastre Naturais, tanba akontese udan bo’ot foin lalais ne’e.
Estrada diresaun Postu Fohorem liga ba kapital Munisipiu at grave difkulta komunidade nia viazen uja transporte publiku no privadu atu transporta produtu lokal asesu ba merkadu, liu liu defisil ba komunidade ne’ebé moras atu asesu ba fasilidade saude.
Tanba ne’e Xefe Suku Dato Rua, Gaudencio Pereira husu IGE atu toma atensaun hodi halo normalizasaun ba estrada at grave ne’ebé durante ne’e komunidade sira infrenta.
“Komunidade sira halerik Liu ba Estrada, por exemplo atu hodi sira nia produtu alokal sira atu hodi mai merkadu susar, tamba estrada at. Tempu udan ona atu mai merkadu la di’ak no mos ba Inan isin rua sira atu mai Sentru Saude iha Postu Fohorem mos dala ruma la di’ak no la mai tanba uluk transporter la iha, Inan isin rua sira tau Iha lipa hulan lori mai Sentru Saude Fohorem, ne’ebé tempu udan hanesan ne’e komunidade sira atu mai Sentru Saude no Merkadu mos la di’ak,” Xefe Suku Dato Rua, Gaudencio Pereira.
Relasiona ho preokupasaun hirak ne’e Autoridade Postu Administrativu identifika ona problema konaba kondisaun Estrada at no mos submete ona Proposta ba Autoridade Munisipiu no IGE hodi solusiona problema Estrada ne’ebé komunidade sira infrenta, maibe seidauk iha resposta.
“Hanesan Autoridade depois hetan orientasaun husi seksaun desenvolvimentu lokal kria kedas proposta ida dirizi ba iha IGE atu bele halo atende emerjensia balun para nune’e bele fasilita kondisaun ba ita nia komunidade. Tanba Ida ne’e ita submete ona proposta no karta ba IGE atu hadi’a dalan, hanesan rai monu no loke be dalan sira, hodi nune be sira la’o tuir nia dalan, maibe proposta ne’ebé mak ami submete to’o agora seidauk hetan responde positivu husi IGE. Ami nafatin husu ba IGE no obras Publiku Iha Munisipiu atu bele konsideran no lalais liu antes ita hare ita nia komunidade sira sai vitima ba iha dalan ne’ebé mak iha” Reprejenta Administrador Postu Fohorem. Ruben do Rego Alves, esplika.
Estrada at grave iha diresaun Postu Administrativu Fohorem ne’ebe liga ba kapital Munisipiu Covalima ho distansia kuaze kilometru rua nulu resin. Enkuantu tuir atulizasaun dadus Postu Administrativu Fohorem, iha xefe familia rihun ida atus nen rua nulu resin hitu ho total populasaun rihun nen hitu nulu resin hitu
Jornalista : Alfredo Barreto
Editor : Chamot Nahac
