Covalima (RCCT) 20-05-25-Loron Independensia Timor Leste ne’ebé monu iha 20 fulan Maiu tinan 2002 ne’ebé tinan ne’e Povu Timor Leste komemora ona ba dala XXIII. Tan ne’e loron 20 fulan maiu hanesan loron ida ne’ebé importante tebes ba Povu hotu-hotu iha obrigasaun atu partisipa iha komemorasaun loron independensia ne’e.
Iha Munisipiu Covalima, Prezidente Autoridade Munisipal, Miguel Armada Cardoso “Razão” dehan loron ida ne’e importante hanesan momentu ne’ebé Timor-Leste dada hasa’e Bandeira Nasional hodi semo ho majestuozu hanesan nasaun sira seluk iha mundu internasional.
“Ohin ita komemorasaun restaurasaun indedependensia, 20 de Maiu ba dala XXIII iha Munisipiu, fiar katak ita nia komunidade sira, funsionariu sira tantu sivil no militar sira hotu mai partisipa, tanba loron ida ne’e importante duni ita ba atu komemora” Prezidente Autoridade Munisipiu Covalima, Miguel Armada Cardoso “Razão” ba Jornalista sira hafoin remata serimonia hasa’e Bandeira Nasional ba komemora loron indenpendensia Timor Leste ba dala XXIII ne’ebé hala’o iha Kampu Futebol Ladi, Kamanasa, Suai, Tersa (20/05).
Iha fatin seluk, Administrador Postu Administrativu (APA) Maukatar, Laurentinho de Jesus, kompromete katak nudar Administrador Postu sei lori loron Nasional hakbesik ba povu hodi komemora hamutuk iha baze.
“Nudar Administrador Postu ohin hamutuk komunidade Maukatar selebra loron restaurasaun independensia, ne’ebé tama ona ba dala XXIII. Ne’ebé agora dadaun planu oin ami sei tama sai suku lori loron bo’ot ida ne’e hakbesik liu ba povu, atu nune’e bele anima povu no povu bele sente katak loron ida ne’e importante tebes ba sira” Administrador Postu Administrativu (APA) Maukatar, Laurentinho de Jesus, dehan.
Nune’e mos Administrador Postu Administrativu (APA) Suai, Idelfonso Maria Amaral, manifesta parabens ba povu tomak liliu ba povu Suai, kompstu husi Suku Lima.
“Parabens ba ha’u nia komunidade iha Postu Administrativu, ha’u nia hakuak bo’ot ba imi nia partisipasaun iha serimonia ida ne’e hodi komemora loron restaurasaun indenpendensia ba dala XXIII, dala ida tan parabens ba ha’u nia komunidade husi suku lima laran tomak” APA Suai Ildefonso fo Parabens.
Serimonia hasa’e Bandeira Nasional hodi komemora loron restaurasaun indenpendensia dala XXIII, iha Munisipiu Covalima hala’o iha Kampu Ladi Kamanasa, Postu Administrativu Suai.
Jornalista : Julio Salinas
Editor : Chamot Nahac
