Nune’e Manorin sira iha EBC Dais hamotuk ema nain tolu nulu resin Organiza malu ba homan fali dambata ne’ebé kuak, basa ai kabelak sira dodok no lahuk hotu, hatomak provizoria ho ai kabur hodi fasilita ema no transporte bele hakur liu ba mai.
Xefe Gabinete husi Eskola Ensinu Baziku Central Dais, Felisidade Moniz, hatete antividade ne’e realiza tanba unidade manorin sira iha EBC Dais ne’e tau kontribuisaun hamotuk.
“Horseik ami tur hamotuk, foti desizaun ohin ami hotu mai hadi’a liliu ponte ne’e, ami hadi’a ho osan, maibe profesor lubuk ida maka na’in rasik hasai osan husi bolsu sosa pregu, ai rame (kawat) no besi beton no profesor balu ta ai hodi mai taka kuak sira ne’ebé ai iha ponte leten dodok no monu hotu ona ba iha mota laran hodi felit hamutuk ai halo metin atu nune’e motor ka kareta liu husi leten ai sira labele hasai ba mai, osan sira ne’ebé hasai la’os eskola nian maibe manorin na’in sira maka sudi hamutuk osan kada ema $ 1.00 ka $ 2.00 hanesan ne’e maka lori sosa pregu, ai rama no besi beton sira ne’e” informa Xefe Gabinete husi Eskola Ensinu Baziku Central Dais, Felisidade Moniz, ba jornalista RCCT iha Ponte Mali Loek, Sabadu (10/02/24).
Felisidade husu ba governu liliu ba ministeriu relevante atu bele tau atensaun ba Ponte Mali Loek ne’ebé kondisaun at durante tinan barak nia laran.
“ ba na’i ulun ne’ebé kompotente ba iha ponte no estrada ninian karik viazem mai iha Suai bele hare mos ba iha ami nia ponte ida ne’e, tanba iha tempu udan afeita liu ba ami nia profesor sira atu bele ultrapasa liu husi ponte ida ne’e hodi mai hanori estudante sira iha EBC Dais, iha biban ne’e husu mos ba autoridade munisipiu Covalima bele tau matan ba ponte ida ne’e hodi hadi’a iha tempu badak nia laran atu nune’e ami bele asesu di’ak ba ensinu aprendisajem iha ami nia eskola ho di’ak,” nia haktuir.
Komunidade utilizador Ponte Maliloek husi Suku Tashilin, Postu Zumalai Martinho Magno hafoin viajem husi Zumalai mai iha Suai liu husi ponte refere sente triste tanba ponte Mali Loek at kleur ona maibe governu troka ba troka, administrador munisipiu troka ba troka mos nunka hanoin ruma atu hadi’a.
“Nudar sidadaun ida sente triste uitoan bainhira haree ba ponte Mali Loek ne’e ponte ki’ik ida, agora iha Covalima ita nia administrador munisipiu troka malu ba mai mos nunka iha hanoin atu hadi’a ponte ida ne’e, liliu iha tempu udan hanesan movimentasaun transpote publiku liu husi fatin ida ne’e arasja uitoan, apresia mos ba manorin na’in sira husi EBC Dais ho voluntariu mai hadi’a hodi tau ai ba ponte ida ne’e, nune’e husu nafatin ba ukun na’in sira tau atensaun ba ponte ida ne’e” Martinho husu.
Entertantu objetivu manorin na’in sira hamotuk na’in tolu nulu resin husi EBC Dais voluntariumente hadi’a provizoria Ponte Mali Loek para hodi fasilita estudante no manorin na’in sira husi Aldeia Sanfuk Suku Kamenasa ba eskola iha Dais no mos fasilita emo hodi inklui transporte publiku ne’ebé durante ne’e halo viazen liu ba mai husi mota laran deit, maibe tempu udan hanesan ne’e bainhira mota tun labele ultrapasa ho seguru.
Jornalista : Julio Salinas
Editor : Chamot Nahac
