Covalima (RCCT) 01-03-24-Governu hari ona fasilidade saude besik ba povu nia let iha area rural sira, maibe laiha pesoal saude ida mak hela permanente iha Gala hodi halo tratamentu ba komunidade ne’ebé sofre moras ruma.

Tan ne’e Xefe Suku Beko, Arlindo Bernadinho Lemos,preokupa iha tempu udan komunidade sira labele hetan tratamentu di’ak tanba la iha pesoal saude atu fo atendementu ba nia povu iha Gala.

“Postu Saude Gala laiha pesoal saude permanenete, ida ne’ebé maka hela iha ne’eba exemplu rai na’in Aldeia Gala nia oan ka parte relevante nian, laiha ema ida hela permanente iha ne’eba hodi servisu, tanba ne’e maka ita nia pesoal sira husi munisipiu, postu maka ba servisu iha ne’eba, sira dader sa’e ba lokraik sira fila fali mai, kuandu tempu udan estrada at hanesan ne’e sira labele ba iha ne’eba, maibe komunidade sira iha ne’eba atu konsulta araska tebes satan ho tempu udan hanesan ne’e moras isin manans, mear inus metin ho hirak ne’e hotu mosu bara barak, tan ne’e mak iha enkontru ida ne’e aprezenta ona mai hanesan autoridade suku, lideransa komunitaria ami sei buka meius oinsa maka konsellu suku bele atende ka iha hanoin ida deit para hodi bele foti took postu saude ida ne’e residensia ba pesoal saude ho postu saude ne’e sai hanesan prioridade ida ba iha programa Planeamentu Dezenvolvimentu Integradu Munisipal (PDIM) nian” Infrma Xefe Suku Beko, Arlindo Bernadinho Lemos ba Jornalista RCCT.

Enkuantu hatan ba preokupasaun ne’e Xefe Sentru Saude Suai, Luciano Mendonça, hateten, parte saude iha ona planu atu hari rezidensia ba pesoal saude sira destaka ba Gala, maibe persija kopersaun husi xefe suku Beko atu idetifika rai hodi bele realiza konstrusaun ne’e.

“Hanoin planu hotu iha ona maibe husu ba Xefe Suku Beko hanoin bele hare took ba postu saude Gala ne’e sobre atu halo residensia tanba ita nia pesoal saude ne’ebé asesu ba iha ne’eba dok tebes dader ba lokraik fila fali mai hanoin ladi’ak, tan ne’e hanoin harii residensia ida ba sira, bainhira sira ba labele fila ba mai ona no hela deit iha ne’eba depois to’o iha loron Sabadu ho Domingu maka sira bele fila mai, sira atu hela iha ne’eba komu fatin maka ladi’ak” nia dehan.

Entertantu Xefe Suku Beko Arlindo Bernadinho Lemos la to’o preokupasaun ne’e wainhira partisipa enkontru entren Administrador Postu Administrativu Suai ho lider komunitaria no liña sektorais sira konaba Palnu Dezenvolvimentu Integradu Munisipal (PDIM) 2025 nian ne’ebé hala’o iha Salaun enkotru Postu Administrativu Suai, Kinta foin lalais.

Jornalista : Julio Salinas

Editor       : Chamot Nahac