SEI hanesan instituisaun governu ne’ebe responsabilidade ba asuntu
igualdade jeneru, tan ne’e iha responsavel halo advokasia no promove asuntu
igualdade jeneru ba autoridade iha nivel aldeia to’o munisipiu.

“Hakarak atu hato’o ami nia objetivu husi atividade
sosializasaun hili Postu Administrativu Zumalai tanba iha Covalima Zumalai maka
suku barak liu, tan ne’e maka ami nia atividade faze primeiru mai uluk iha ne’e
para fahe informasaun ba iha autoridade lokal sira hanesan xefe suku no  xefe aldeia sira liliu kona ba igualdade
jeneru no violensia bazeia ba jeneru, hanesan ita hotu hatene katak SEI hanesan
instituisaun govermu ne’ebe maka responsavel ba asuntu igualdade jeneru, atu
halo promosaun ba igualdade jeneru, tan ne’e ami nia knaar ida atu halo
advokasia oinsa maka atu bele promove igualdade jeneru ne’e iha ita nia
munisipiu rasik, iha oportunidade ida ne’e ita hakarak hatete ko’alia kona ba
asuntu igualdade jeneru laos preokupasaun feto sira nian de’it maibe
preokupasaun ita hotu nian, tanba ne’e maka ohin loron ami mai halo atividade
sosializasaun iha ne’e konvida xefe suku no konsellu suku atu bele fahe
informasaun ba ita boot sira, atu nune’e ita boot sira bele iha informasaun
naton liliu liga ba asuntu igualdade jeneru no violensia bazeia ba jeneru atu
nune’e ita boot sira bele halo advokasia di’ak liu tan hahu husi nivel aldeia,
suku, to’o postu oinsa maka ita hotu hamutuk halo advokasia promove asuntu
igualdade jeneru ne’e ho di’ak” informa Pontu Fokal SEI Munisipiu Covalima Francisco Trannjanos G. de
Araujo. 

Administrador Postu Administrativu Zumalai, Alipio Magno, husu ba xefe
suku no xefe aldeia sira atu kontinua habelar informasaun ba komunidade liliu
ba sira ne’ebe hela iha area rural basa durante ne’e menus asesu ba informasaun
konaba igualdade jeneru.

“Asuntu sira ne’e importante liliu ba ita sira ne’ebe ukun
na’in husi postu tun ba to’o nivel suku no aldeia, tanba ida ne;e maka ligadu
ho informasaun ne’e importante konvida ita boot sira mai atu rona, depois rona
informasaun fila ba labele tuur nonok maibe fila ba kontinua hato’o fila fali
informasaun sira ne’e ba ita nia komunidade sira, ita boot sira nudar xefe
aldeia bele halo planu enkontru ho komunidade sira, liu husi atividade sira
ne’e maka bele hamosu ona informasaun sira ne’e atu bele sira hatene tuir saida
maka violensia bazeia ba jeneru liliu ba ita nia inan sira hela iha Ucekai,
Mape no sira seluk” APA
Zumalai dehan.

Reprezenta Komandante PNTL Munisipiu Covalima Joãguim da Costa, liu husi
formasaun sira hanesan ne’e bele redus ona numeru violemsia iha uma laran no
mos violensia entre grupu organizadu sira.

“Objetivu husi ita nia ajenda ne’e maka atu sosializa ka
sensibiliza ba iha asuntu igualdade jeneru no violensia bazeia ba jeneru, molok
tama ba asuntu ne’e hau bele informa ba ita hotu iha fatin ida ne’e katak
situasaun atual iha Covalima inklui Zumalai neste momentu sei lao di’ak,
hanesan ohin hato’o ona situasaun ida ne’e sempre mosu problema ki’ik oan sira,
problema violensia domestika, problema seluk mos ligasaun ba iha violensia
bazeia ba jeneru ne’e parte ida iha situasaun, problema seluk asaltu entre
individual ida ba individual seluk ne’e baibain iha termu juridiku ne’e
agresaun fizika, simples agravadu ida ne’e maka sempre akontese iha ita nia rai
laran maibe ne’e normalmentu iha fatin ne’ebe peoblema sira hanesan ne’e sempre
akontese, no problema seluk maka mai husi grupu ba laloos, mai husi aldeia ba
laloos ne’e sempre akontese situasaun sira hanesan presija halo intervensaun ba
ita hotu liliu ita sira ne’ebe maka direita ba iha komunidade” nia dehan

Entertantu sosializasaun ne’e hala’o iha salaun enkontru Administrasaun
Postu Administrativu Zumalai, no hetan partisipasaun masimu husi APA Zumalai,
reprezentante komunidade inklui xefe suku sira no xefe aldeia no konsellu suku
sira hotu

Jornalista : Julio Salinas

Editor      : Chamot
Nahac