Covalima( RCCT )10-02-21 Servisu Saude Munisipiu Covalima sei halo konstrusaun ba Postu Saude 3, rezidensia ba mediku, hodi fasilita mediku sira nebe servisu iha Posto Saude refere no mos hari edifisiu maternidade iha Postu Administrativu Fohorem no Tilomar.
Ofisial Logistica Servisu Saude Munisipal Abrão Nascimento hateten Postu Saude ne’e sei hari iha Aldeia Nainare Suco Holpilat Postu Administrativu Maukatar, Aldeia Fatuk Metan, Suku Beiseuk Postu Administrativu Tilomar no mos Postu Saude ida iha Suku Suai Loro Postu Administrativu Suai.
“Planu proposta ne’ebe Mak husi Ministeriu Saude Liu husi Servisu Saude Munisipal, hato’o ona proposta atu halo konstrusaun ba Postu Saude iha Aldeia Nainare Suku Holpilat Postu Administrativu Maukatar nomos konstrusaun Postu Saude iha Fatuk Metan Suku Beiseuk Postu Administrativu Tilomar, depois sei halo konstrusaun mos ba Postu Saude iha Suku Suai Loro Postu Administrativu Suai.” Abrão Esplika.
Ofisial Logistica Servisu Saude Munisipal fundamenta Aleinde hari Postu Saude, Servisu Saude Munisipal mos iha planu atu hari tan rezidensia ba Pesoal Saude sira iha Fatumea Alas Tehen no mos edifisiu Maternidade iha Postu Administrativu Fohorem no Tilomar.
“ ita mos sei hari rezidensia ba Mediku sira iha Alas Tehen Postu Administrativu Fatumea no rezidensia mediku ida iha Suku Dato Tolu Postu Administrativu Fohorem, Iklui sei hari mos edifisiu maternidade iha Sentru Saude Tilomar no Fohorem.” Informa Abrão Nascimento iha salaun Administrasaun Municipio Covalima hafoin remata egnkontu linha Ministerial hodi aprezenta planu servisu nivel Munisipal ba 2022 Quarta Feira (10-02-21).
Nia dehan Ministerio Saude liu husi servisu Saude Munisipal Iha Covalima prepara ona rekursu uumanu atu koloka ba fatin sira ne’ebe identifika hodi hari Postu Saude ne’e.
“foin lalais ne’e husi Ministeriu Saude mos rekruta tan funsionariu ba Mediku, Infermeiru/a no Analista sira seluk, tanba ne’e Ema sira ne’e bele koloka fali ba Postu Saude Sira ne’ebe mak Ita planu hela, Servisu Saude Munisipiu kalkula ona ba rekursu hirak ne’e bele halo servisu iha Postu Saude ne’ebe mak Ita atu hari iha tinan oin ne’ebe mak kada Postu Saude ida bele koloka pessoal Saude Nai’n Rua ou Tolu.” Katak Abrão.
Engkuantu Planu Konstrusaun Postu Saude, Rezidensia ba Mediku no Edifisiu Maternidade ne’e servisu Saude Munisipiu Covalima sei realiza iha tinan 2022.
Jornalista : Saturnino Soares
Editor : Chamot Nahac
