Komemora Loron Mundial Feto, Maria Fo Parabens ba Feto Maluk Sira Iha Covalima
Covalima (RCCT) 08-03-23, Komemora loron mundial feto, Prezidente Asosiasaun Feto Munisipiu Covalima, Maria Fatima kongratula feto maluk sira mundo no Covalima.
Atual Xefe Suku Maudemo ne’e afirma iha loron espesial ida ne’e presija atu hadi’a no halo liña kordenasaun entre feto no mane hodi serbisu hamotuk hala’o dezenvolvimentu di’ak liu tan.
“Hakarak atu hato’o deit ami nia mensajem ba kolega feto sira hotu iha mundu espesial ba feto maluk sira Munisípiu Covalim “parabens”, Ita tenke halo liña kordenasaun entre feto no mane hare liliu iha parte serbisu nian, nune’e atu ita hala’o dezenvolvimentu, karik feto no mane presija tebes atu serbisu hamutuk hodi hala’o dezenvolvimentu liliu iha ita nia rai Covalima” dekralara Prezidente Asosiasaun Feto Munisipiu Covalima, Maria Fatima ba jornalista sira hafoin partisipa serimonia selebrasaun loron mundial feto ne’ebe organiza husi World Vision ne’ebé hala’o iha salaun Administrasaun Munisípiu Covalima, Kuarta (08/03).
Reprezentante Juventude Feto Covalima, Marciana Vitoria Moniz, orgullu no kontente tanba liu husi selebrasaun loron mundial feto bele hafanun fila fali feto maluk sira hotu katak feto mos iha direitu atu bele hamrik iha oin.
“Ha’u husi Munisípiu Covalima nia oan rasik, nudar reprezentante feto maluk juventude ninian, hau sente orgullu no kontente ba loron ida ohin ne’e, tanba bele hafanun fila fali ami nia feto maluk sira, tanba barak maka dehan feto laiha direitu maibe loron ohin hafanun fila fali katak loron ida ohin ne’e feto mos iha direitu tebes atu bele hamrik iha oin” nia hakotu.
Entertantu Partisipa Iha Komemorasaun Loron Mundial Feto Ne’ebé Organiza Husi World Vision Iha Munisipiu Covalima Hetan Partisipasaun Husi Sekretaria Munisípiu Covalima, Pntl Munisípiu Covalima, Administrador Postu Administrativu Sira, Xefe Suku Sira, Centru Comunidade Covalima, Pradet, Grupu Feto Sira Inklui Madre Sira.
Reportazen Ekipa RCCT
Editor CN
